ឧទ្យាន​ជាតិ​គី​រី​រម្យ​មាន​សក្តានុពល​ខ្លាំង​ក្នុង​ការ​ក្លាយ​ជាគោល​ដៅ​ទេសចរណ៍​ថ្មី​

សេចក្ដីលម្អិត

ជំពូក៖ ព័ត៌មានទេសចរណ៍

ខណៈដែលរាជរដ្ឋាភិបាលកម្ពុជាបានសង្កត់ធ្ងន់លើវិស័យទេសចរណ៍ជាសសរស្តម្ភដ៏សំខាន់មួយសម្រាប់ការសម្រេចបាននូវយុទ្ធសាស្ត្របញ្ចកោណ អ្នកពាក់ព័ន្ធមកពីវិស័យទេសចរណ៍បានឯកភាពថាកម្ពុជាត្រូវការតំបន់ទេសចរណ៍ទាក់ទាញបន្ថែមទៀត ហើយតំបន់ដ៏មានសក្តានុពលថ្មីនេះអាចជាឧទ្យានជាតិគីរីរម្យ។

ឧទ្យានជាតិគិរីរម្យ ដែលមានព្រៃដើមស្រល់ គឺជាតំបន់លេចធ្លោមួយនៅអាស៊ីអាគ្នេយ៍។ ប្រព័ន្ធអេកូឡូស៊ីដ៏ពិសេសនេះមិនត្រឹមតែធ្វើអោយឧទ្យានជាតិគិរីរម្យជាកន្លែងទេសចរណ៍ប៉ុណ្ណោះទេ ប៉ុន្តែជាមជ្ឈមណ្ឌលសំខាន់សម្រាប់វិស័យទេសចរណ៍សុខភាព ផងដែរ។ បរិយាកាសស្ងប់ស្ងាត់ រួមផ្សំជាមួយនឹងស្រល់ក្រអូប ផ្តល់នូវបរិយាកាសរីករាយពីទីប្រជុំជន ដែលធ្វើឱ្យវាក្លាយជាគោលដៅទាក់ទាញសម្រាប់អ្នកដែលចង់កម្សាន្តជាមួយធម្មជាតិ។

គីរីរម្យមានកម្ពស់ ៧០០ ម៉ែត្រ និងមានឈ្មោះផ្លូវការថាឧទ្យានជាតិព្រះសុរាម្រិតកុសមៈគីរីរម្យ មានទីតាំងនៅភូមិដំរីផុង ឃុំគីរីរម្យ ស្រុកភ្នំស្រួច ចម្ងាយប្រហែល ១១៧គីឡូម៉ែត្រ ពីរាជធានីភ្នំពេញ ហើយត្រូវធ្វើដំណើរប្រហែលបីម៉ោងពីភ្នំពេញ។

យោងតាមវិគីភីឌា ឈ្មោះគិរីរម្យមានន័យថាភ្នំសប្បាយ ហើយនេះជាឈ្មោះមានតាំងពីទសវត្សរ៍ឆ្នាំ ១៩៣០ ដោយព្រះបាទមុនីវង្ស។ ប៉ុន្តែ ឈ្មោះដើមបុរាណគឺ ភ្នំវរវង្សសូរវង្ស សំដៅលើភ្នំពីរដែលភ្ជាប់គ្នាពាក់ព័ន្ធនឹងរឿងនិទានបងប្អូនពីរនាក់។

ដើម្បីផ្តល់បទពិសោធន៍អោយកាន់តែអស្ចារ្យនៅគីរីរម្យ គួរតែផ្តល់នូវសកម្មភាពជាច្រើនដែលសមស្របនឹងទេសភាពដ៏ស្ងប់ស្ងាត់ ដូចជា ការឡើងភ្នំ និងដំណើរកម្សាន្តក្នុងព្រៃ។

ទីតាំងនេះអាចផ្តល់នូវបទពិសោធន៍បោះជំរុំដ៏អស្ចារ្យ រួមមានការមើលសត្វស្លាប និងស្វែងយល់ពីរុក្ខជាតិប្លែកៗ។ បន្ថែមពីលើនេះ យើងអាចមានសកម្មភាពជិះកង់ឡើងភ្នំដែលបំពេញតម្រូវការរបស់អ្នកដំណើរបែបផ្សងព្រេង ដោយផ្តល់នូវភាពស្ងប់ស្ងាត់ និងការផ្សងព្រេង។

Catherine Germier-Hamel ស្ថាបនិក និងជានាយកប្រតិបត្តិនៃ Millennium Destinations បាននិយាយថា ដោយមានទេសភាពដ៏អស្ចារ្យ និងជីវចម្រុះដ៏សម្បូរបែប ឧទ្យានជាតិគីរីរម្យអាចជាទីកន្លែងកម្សាន្តធម្មជាតិសម្រាប់អ្នកដែលចង់គេចចេញពីទីក្រុងអ៊ូអរ។ ខណៈដែលឧទ្យាជាតិគីរីរម្យមានលក្ខណៈធម្មជាតិសុទ្ធសាធ ឧទ្យាននេះមានសក្តានុពលយ៉ាងធំធេងក្នុងការក្លាយជាគោលដៅទេសចរណ៍ធម្មជាតិថ្មី។ ការអភិវឌ្ឍន៍ប្រកបដោយទំនួលខុសត្រូវផ្អែកលើគោលការណ៍ចីរភាពអាចធ្វើអោយទីតាំងនេះក្លាយជាគោលដៅដ៏មានសក្តានុពល។

លោក Jean-Benoît Lasselin ដៃគូគ្រប់គ្រងនៅ C4 Adventures បានលើកឡើងថា “នៅក្នុងទសវត្សរ៍ក្រោយ ខ្ញុំស្រមៃថាគិរីរម្យនឹងវិវត្តទៅជាគោលដៅទេសចរណ៍លំដាប់ខ្ពស់ និងត្រូវបានអភិរក្សបើធៀបទៅនឹងតំបន់ Son Doong ក្នុងប្រទេសវៀតណាម”។

វិធីសាស្រ្តនេះនឹងមិនត្រឹមតែការពារប្រព័ន្ធអេកូឡូស៊ីប៉ុណ្ណោះទេ ប៉ុន្តែថែមទាំងធានាបានថាវិស័យទេសចរណ៍រួមចំណែកដោយផ្ទាល់ដល់ការអភិរក្ស។ តាមរយៈការធ្វើទេសចរណ៍ប្រកបដោយចីរភាព គីរីរម្យអាចបង្កើតប្រាក់ចំណូលយ៉ាងច្រើន ដែលអាចត្រូវបានវិនិយោគឡើងវិញទៅក្នុងកិច្ចខិតខំប្រឹងប្រែងអភិរក្សក្នុងស្រុក និងការអភិវឌ្ឍន៍សហគមន៍។

បញ្ហាប្រឈមចម្បងសម្រាប់ឧទ្យានជាតិគីរីរម្យ កើតចេញពីការគំរាមកំហែងដែលបង្កឡើងដោយទេសចរណ៍បែបទ្រង់ទ្រាយធំ ដែលអាចនាំឱ្យមានការរិចរិលបរិស្ថាន ប្រសិនបើមិនមានការគ្រប់គ្រងដោយប្រុងប្រយ័ត្ន។ បញ្ហាដូចជាការកាប់ឈើខុសច្បាប់ និងការគ្រប់គ្រងសំរាម ត្រូវការការយកចិត្តទុកដាក់ជាបន្ទាន់។

តំបន់នេះក៏ប្រឈមនឹងសម្ពាធពីគម្រោងអភិវឌ្ឍន៍រយៈពេលខ្លីដែលផ្តល់អត្ថប្រយោជន៍ភ្លាមៗជាជាងនិរន្តរភាពរយៈពេលវែង។ ការធានាបាននូវការថែរក្សាប្រព័ន្ធអេកូឡូស៊ីរបស់គីរីរម្យ ខណៈដែលបំពេញតម្រូវការរបស់ភ្ញៀវទេសចរ ទាមទារវិធីសាស្រ្ត និងការសម្របសម្រួលល្អ ដែលធ្វើអោយមានតុល្យភាពអេកូឡូស៊ីជាមួយនឹងកំណើនទេសចរណ៍។

កាលពីរបបខ្មែរក្រហម គីរីរម្យស្ថិតនៅក្រោមរដ្ឋបាលស្រុកភ្នំស្រួច ក្នុងខេត្តកំពង់ស្ពឺ។ ខ្មែរក្រហមបានកែប្រែព្រំប្រទល់ដោយដាក់ឈ្មោះថាប្រតិបត្តិការតំបន់ ៣កំពង់ស្ពឺ។ ប្រជាជនភាគច្រើនមកពីឃុំចំបក់ ស្រុកភ្នំស្រួច។

ដកស្រង់ពី៖ ខ្មែរថាមស៍