រយៈពេល៣ខែដើមឆ្នាំ២០២៤នេះ គ្រឹះស្ថានអង្គរដែលគ្រប់គ្រងការលក់សំបុត្រចូលទស្សនាតំបន់អង្គរ រកចំណូលបាន ១៦ ៥៣៣ ២៩៣ដុល្លារអាមេរិក គឺឡើងជាង៤៨ភាគរយធៀបនឹងឆ្នាំ២០២៣។
តាមសេចក្ដីប្រកាសព័ត៌មានរបស់គ្រឹះស្ថានអង្គរ ពីខែមករា ដល់ខែមីនា ឆ្នាំ២០២៤ ទេសចរដែលចូលទិញបណ្ណ ឬសំបុត្រចូលទស្សនាតំបន់អង្គរសរុបមានចំនួន ៣៤៧ ៥៣៤នាក់ គិតជាថវិកាស្មើនឹង ១៦ ៥៣៣ ២៩៣ដុល្លារអាមេរិក។ក្នុងនោះត្រឹមខែមីនា ទេសចរទិញសំបុត្រ មានចំនួន ១១១ ៦៨៤នាក់ គិតជាថវិកាស្មើនឹង ៥ ២៩៨ ៦១៨ដុល្លារ។
ជាមួយគ្នានេះដែរ គ្រឹះស្ថានអង្គរក៏បានរាយការណ៍ពីចំណូលលក់សំបុត្រចូលទស្សនាប្រាសាទកោះកែរ ដែលក្នុងនោះ ខែមីនារកចំណូលបាន ៣៤ ២១៥ដុល្លារអាមេរិក ហើយបើសរុបរយៈពេល៣ខែដើមឆ្នាំ ស្មើនឹងចំនួន ១២១ ១៥៥ដុល្លារអាមេរិក៕
ដកស្រង់ពី៖ ខ្មែរថាមស៍