អង្គការ​អភិ​រក្ស​អន្តរជាតិ​កម្ពុជា​បាន​ជួយសង្គ្រោះ​ស្វា​ព្រាម​ ​អាយុ​ពីរ​ខែ​ដោយ​ជោគជ័យ​

សេចក្ដីលម្អិត

ជំពូក៖ ព័ត៌មានទេសចរណ៍

អង្គការអភិរក្សអន្តរជាតិកម្ពុជា សហការជាមួយមន្ទីរបរិស្ថានខេត្តកំពង់ធំ បានជួយសង្គ្រោះកូនសត្វស្វាព្រាមមួយក្បាល អាយុ២ខែ ដែលត្រូវបានចាប់ចេញពីព្រៃ ដើម្បីរក្សាទុកជាសត្វចិញ្ចឹមក្នុងផ្ទះ ដោយជោគជ័យ ។

កូនស្វាព្រាមនេះ ត្រូវបានបញ្ជូនបន្តទៅមជ្ឈមណ្ឌលសង្គ្រោះភ្នំតាម៉ៅ ដើម្បីថែទាំ នេះបើយោងតាមអង្គការអភិរក្សអន្តរជាតិកម្ពុជា ដែលបានបង្ហោះនៅលើ Facebook នៅថ្ងៃទី១ ខែមីនា ឆ្នាំ២០២៤។

ស្វាព្រាម (Silvered Langurs) ត្រូវបានគេស្គាល់ដោយអាកប្បកិរិយាស្ងប់ស្ងាត់របស់វា។ គិតត្រឹមឆ្នាំ២០១៥ ពួកវាត្រូវបានចាត់ថ្នាក់ថាជាសត្វជិតផុតពូជដោយសហភាពអន្តរជាតិសម្រាប់ការអភិរក្សធម្មជាតិ (IUCN) ។ ប្រភេទសត្វនេះប្រឈមនឹងការគំរាមកំហែងយ៉ាងខ្លាំង រួមទាំងការបំផ្លិចបំផ្លាញទីជម្រក ដោយសារការផ្លាស់ប្តូរការប្រើប្រាស់ដី ការបរបាញ់សត្វព្រៃ ការជួញដូរសត្វចិញ្ចឹមខុសច្បាប់ និងការយកទៅធ្វើជាឱសថបុរាណ។

ការកាប់បំផ្លាញព្រៃឈើ និងការរិចរិលទីជម្រក ជាពិសេសសម្រាប់ការអភិវឌ្ឍន៍គម្រោងនានា ដូចជាចម្ការកៅស៊ូ បង្កហានិភ័យយ៉ាងធ្ងន់ធ្ងរ។ ការបែកខ្ញែកនៃទីជម្រករបស់ពួកវាបាននាំឱ្យចំនួនប្រជាសាស្ត្រត្រូវបែងចែកទៅជាក្រុមតូចៗ និងនៅដាច់ដោយឡែកពីគ្នា ដែលធ្វើអោយពួកវាទទួលរងការគំរាមកំហែងកាន់តែធ្ងន់ធ្ងរបន្ថែមទៀត។

ដើម្បីបញ្ឈប់ការធ្លាក់ចុះនៃចំនួនសត្វស្វាព្រាម ចាំបាច់ត្រូវមានការពង្រឹងវិធានការការពារ។ ទាំងនេះគួរតែរួមបញ្ចូលការការពារជម្រករបស់ពួកវា និងការអនុវត្តការរឹតបន្តឹងការហាមឃាត់ការបរបាញ់។

អង្គការអភិរក្សអន្តរជាតិកម្ពុជា បានបញ្ជាក់ថា “យើងសូមអញ្ជើញអ្នកឱ្យចូលរួមជាមួយយើងក្នុងកិច្ចខិតខំប្រឹងប្រែងរបស់យើងដើម្បីការពារ និងអភិរក្សប្រភេទសត្វព្រៃដ៏កម្រនេះ”។

ដកស្រង់ពី៖ ខ្មែរថាមស៍