កម្ពុជា​ទទួល​បាន​ជោគជ័យ​ផ្នែក​វប្បធម៌​ជាមួយនឹង​កិត្តិយស​ជាសាកល

សេចក្ដីលម្អិត

ជំពូក៖ ព័ត៌មានទេសចរណ៍

ព្រះរាជាណាចក្រកម្ពុជា ទទួលបានការផ្ញើសារអបអរទូទាំងវិស័យទេសចរណ៍ និងធ្វើដំណើរ ដោយកម្ពុជាទទួលបានពានរង្វាន់ទេសចរណ៍ពិភពលោក (World Travel Awards)ជាគោលដៅវប្បធម៌ឈានមុខគេនៅអាស៊ី សម្រាប់ឆ្នាំ២០២៣ នៅដើមសប្តាហ៍នេះ។ លោក សុខ សូកេន រដ្ឋមន្ត្រីក្រសួងទេសចរណ៍ បានសរសេរលើបណ្តាញតេឡេក្រាមរបស់លោកកាលពីថ្ងៃពុធ ដោយបានអបអរសាទរចំពោះកិត្តិយសនេះ និងបានកត់សម្គាល់ថាសមិទ្ធផលនេះ បញ្ជាក់ថាប្រទេសកម្ពុជាជា «គោលដៅដែលត្រូវតែមកទស្សនា សម្រាប់អ្នកចូលចិត្តវប្បធម៌ទាំងអស់»។

លោក តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍បានពណ៌នាប្រទេសកម្ពុជាថាជាគោលដៅទេសចរណ៍វប្បធម៌ និងអេកូឡូស៊ី ដោយបានលើកឡើងពីភាពទាក់ទាញចំណាប់អារម្មណ៍នៃឧទ្យានបុរាណអង្គរ និងឆ្នេរសមុទ្រដ៏ស្រស់ស្អាតនៃខេត្តព្រះសីហនុ។

កាលពីឆ្នាំមុន ក្រសួងទេសចរណ៍បានរាយការណ៍ថា មានភ្ញៀវទេសចរបរទេសសរុបជិត ៥,៤៥ លាននាក់ ដោយទទួលបានចំណូល ដល់ទៅ ៣,០៨ ប៊ីលានដុល្លារ ដែលស្មើនឹង ៧,៥ ភាគរយ នៃផលិតផលក្នុងស្រុកសរុប។ វិស័យទេសចរណ៍បានផ្តល់ការងារដោយផ្ទាល់សម្រាប់ប្រជាពលរដ្ឋ ចំនួន ៤៥០,០០០ នាក់។

Katrine Solhaug ម្ចាស់ផ្ទះសំណាក់ Babel និង Babel Boutique Hotel ខេត្តសៀមរាប ប្រាប់កាសែតខ្មែរថាមស៍កាលពីថ្ងៃព្រហស្បតិ៍ ថា “នេះជាដំណឹងដ៏ល្អសម្រាប់ពួកយើងដែលធ្វើការក្នុងវិស័យទេសចរណ៍នៅទីនេះ។ ឧស្សាហកម្មទេសចរណ៍ជាច្រើននៅតែកំពុងរងផលប៉ះពាល់បន្ទាប់ពីជំងឺកូវីដ ព្រោះថាវិស័យទេសចរណ៍មិនទាន់វិលមកដូចដើមនៅឡើយទេ។ យើងត្រូវការការជំរុញបន្ថែមទៀត។

David Totten វិនិយោគិន និងជាអតីតនាយកគ្រប់គ្រងក្រុមហ៊ុន Emerging Markets Consulting បានលើកឡើងថា ការទទួលស្គាល់ជាអន្តរជាតិចំពោះបេតិកភណ្ឌវប្បធម៌របស់កម្ពុជា នឹងទាក់ទាញភ្ញៀវទេសចរដែលមានគុណភាពខ្ពស់ ហើយទាក់ទាញពួកគេឱ្យស្នាក់នៅក្នុងប្រទេសកម្ពុជាបានយូរ។

លោក សោម សុជាតិ អ្នកគ្រប់គ្រងកម្មវិធី អេកូទេសចរណ៍ និងបដិសណ្ឋារកិច្ច នៃសមាគមទេសចរណ៍អាស៊ីប៉ាស៊ីហ្វិកកម្ពុជា បាននិយាយថា “សូមអបអរសាទរកម្ពុជាជាទីស្រលាញ់របស់ខ្ញុំ ដែលបានឈ្នះពានរង្វាន់ទេសចរណ៍ពិភពលោកឈានមុខគេនៅអាស៊ី។ កម្ពុជាពិតជាមានផលិតផលជាច្រើនដើម្បីផ្តល់ជូនភ្ញៀវទេសចរណ៍អន្តរជាតិ សូមអញ្ជើញមកទស្សនា ដោយមេត្រី”។

Catherine Germier-Hamel ស្ថាបនិក និងជានាយកប្រតិបត្តិនៃ Millennium Destinations បានសួរថា តើប្រទេសកម្ពុជាចាំបាច់ត្រូវទទួលស្គាល់ម្តងទៀតថាជាគោលដៅទេសចរណ៍វប្បធម៌ឈានមុខគេដែរឬទេ? ខណៈដែលពានរង្វាន់នេះ អាចជំរុញការមកដល់របស់ភ្ញៀវទេសចរ និងកិត្យានុភាពនៃព្រះរាជាណាចក្រ ពួកគេអាចរួមចំណែកក្នុងវិស័យទេសចរណ៍ នៅកន្លែងដែលពេញនិយមនានា បង្កើនភាពរីករាយ និងផ្តោតលើការអភិវឌ្ឍប្រកបដោយចីរភាព។ ការផ្តល់អាទិភាពដល់ភ្ញៀវទេសចរនូវបទពិសោធន៍ដ៏អស្ចារ្យ ការការពារបរិស្ថាន និងការគ្រប់គ្រងភ្ញៀវទេសចរណ៍ នឹងធ្វើឱ្យប្រទេសកម្ពុជាកាន់តែមានភាពទាក់ទាញ។

Richard Casswell នាយកគ្រប់គ្រងក្រុមហ៊ុន Kouprey Adventures បាននិយាយថា «ខ្ញុំរីករាយដែលឃើញកម្ពុជាឈ្នះពានរង្វាន់ទិសដៅទេសចរណ៍វប្បធម៌ឈានមុខគេនៅអាស៊ី ព្រោះពិព័រណ៍ពាណិជ្ជកម្ម ITB ជិតដល់ហើយ។ សង្ឃឹមថា ពានរង្វាន់នឹងនាំប្រទេសកម្ពុជាទទួលបានការចាប់អារម្មណ៍ពីប្រជាជនក្នុងឆ្នាំខាងមុខនេះ។ប្រទេសកម្ពុជាគឺជាកន្លែងដ៏អស្ចារ្យមួយនាពេលបច្ចុប្បន្ន និងត្រៀមខ្លួនជាស្រេចដើម្បីទទួលភ្ញៀវទេសចរអន្តរជាតិពីគ្រប់ទីកន្លែង។

របាយការណ៍ខែកុម្ភៈរបស់ក្រសួងទេសចរណ៍ បានប៉ាន់ប្រមាណថាមានការកើនឡើងប្រចាំឆ្នាំ ១១៥ ភាគរយ។ ចំនួនភ្ញៀវទេសចរបរទេសបានកើនឡើង ១៤០ ភាគរយធៀបនឹងតួលេខឆ្នាំមុនដែលមានចំនួន ២,២៧ លាននាក់។ ជាមធ្យមភ្ញៀវទេសចរម្នាក់ៗបានស្នាក់នៅ ៧,៦ ថ្ងៃ នៅក្នុងព្រះរាជាណាចក្រ។

ដកស្រង់ពី៖ ខ្មែរថាមស៍