សម្តេចភក្តី សាយ ឈុំ អញ្ជើញជាអធិបតីដ៏ខ្ពង់ខ្ពស់ ក្នុងពិធីប្រកាស ប្រធាន អនុប្រធាន ទី១ ទី ២ ក្រុមការងារគណបក្ស ចុះមូលដ្ឋានខេត្តត្បូងឃ្មុំ

សេចក្ដីលម្អិត

ជំពូក៖ ព័ត៌មានខេត្ត

(ត្បូងឃ្មុំ)៖ ថ្ងៃទី ១៧ ខែធ្នូ ឆ្នាំ២០២៣ សម្តេចវិបុលសេនាភក្តី សាយ ឈុំ អនុប្រធានគណបក្សប្រជាជនកម្ពុជា និងជាប្រធានគណៈប្រចាំការ នៃគណៈអចិន្ត្រៃយ៍គណៈកម្មាធិការកណ្តាល គណបក្សប្រជាជនកម្ពុជា បានអញ្ជើញជាអធិបតីដ៏ខ្ពង់ខ្ពស់ ក្នុងពិធីប្រកាស ប្រធាន និងអនុប្រធាន ក្រុមការងារគណបក្សចុះមូលដ្ឋានខេត្តត្បូងឃ្មុំ។

ដោយបានសម្រួលភារកិច្ច សម្ដេចអគ្គមហាពញាចក្រី ហេង សំរិន ពីប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ ចាត់តាំង ឯកឧត្តម ជា សុផារ៉ា ជាប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ ជំនួសសម្ដេចអគ្គមហាពញាចក្រី ហេង សំរិន ចាត់តាំង ឯកឧត្តម វង សូត ជាអនុប្រធានទី ១ ក្រុមការងារគណបក្សចូលមូលដ្ឋានខេត្ត ជំនួសឯកឧត្តម ជា សុផារ៉ា និង ចាត់តាំង ឯកឧត្តម អ៊ាង សុផល្លែត ជាអនុប្រធានទី ២ ក្រុមការងារគណបក្សចុះមូលដ្ឋានខេត្តត្បូងឃ្មុំ ។

ពិធីនេះប្រព្រឹត្តទៅ នៅស្នាក់ការគណបក្សស្រុកត្បូងឃ្មុំ ស្ថិតនៅភូមិទួលវិហារ ឃុំជីរោទ៍ទី២ ស្រុកត្បូងឃ្មុំ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ក្រុមការងារគណបក្សថ្នាក់កណ្តាលចុះមូលដ្ឋានខេត្ត ឯកឧត្តម ស៊ាក ឡេង ប្រធានគណៈកម្មាធិការគណបក្សខេត្ត ឯកឧត្តមបណ្ឌិត ជាម ច័ន្ទសោភ័ណ ប្រធានក្រុមការងារយុវជនគណបក្សខេត្ត, សមាជិកគណៈអចិន្ត្រៃយ៍គណបក្ស ក្រុមការងារយុវជនគណបក្ស ក្រុង ស្រុក ឃុំ សង្កាត់ និងសមាជិក សមាជិកា បក្សខេត្ត ក្រុង ស្រុក ឃុំ សង្កាត់ ភូមិ ព្រមទាំងអ្នកពាក់ព័ន្ធ ប្រមាណជិត ៤ពាន់នាក់។

ក្នុងឱកាសនោះ ឯកឧត្តម ម៉ឹង សុវណ្ណ សមាជិកគណៈកម្មាធិការកណ្តាល និងជាអនុប្រធានគណៈចាត់តាំងនៃគណៈកម្មាធិការកណ្តាល បានអានសេចក្តីសម្រេចរបស់គណៈអចិន្ត្រៃយ៍នៃគណៈកម្មាធិការកណ្ដាល ស្តីពីការកែសម្រួលភារកិច្ចសម្តេចអគ្គមហាពញាចក្រី ហេង សំរិន ប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ និងតែងតាំង៖ -ឯកឧត្តម ជា សុផារ៉ា ជាប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ ជំនួសសម្តេចអគ្គមហាពញាចក្រី ហេង សំរិន ។

-ឯកឧត្តម វង សូត ជាអនុប្រធានទី១ ក្រុមការងារគណបក្សចុះមូលដ្ឋានខេត្តត្បូងឃ្មុំជំនួសឯកឧត្តម ជា សុផារ៉ា ។ និង -ឯកឧត្តម អ៊ាង សុផល្លែត ជាអនុប្រធានទី២ ក្រុមការងារគណបក្សចុះមូលដ្ឋានខេត្តត្បូងឃ្មុំ។

តមក ឯកឧត្តម ស៊ាក ឡេង សមាជិកគណៈកម្មាធិការកណ្តាល និងជាប្រធានគណៈកម្មាធិការគណបក្សខេត្ត បានអានរបាយការណ៍ស្វាគមន៍ជូនអង្គពិធីបានជ្រាប រួចមក ឯកឧត្តមឧបនាយករដ្ឋមន្រ្តី ជា សុផារ៉ា សមាជិកអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ បានសម្ដែងនូវ ចំណាប់អារម្មណ៍ និងការប្តេជ្ញាចិត្តខ្ពស់ ស្របតាមគោលនយោបាយបក្ស ជាពិសេសចូលរួមការពារប្រៀបឈ្នះរបស់គណបក្សប្រជាជនកម្ពុជា ដើម្បីធានាបានថា គោលនយោបាយជាយុទ្ធសាស្ត្រ ក្នុងការពារសុខសន្តិភាព, ស្ថិរភាពនយោបាយ, សន្តិសុខ និងសណ្តាប់ធ្នាប់សាធារណៈ នឹងអនុវត្តបន្តទៅមុខ ជាប្រយោជន៍សម្រាប់ជាតិ និងប្រជាជន។

ក្នុងឱកាសនោះ សម្តេចវិបុលសេនាភក្តី សាយ ឈុំ អនុប្រធានគណបក្ស និងជាប្រធានគណៈប្រចាំការនៃគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា បានលើកឡើងថា ពិធីប្រកាស ប្រធាន និងអនុប្រធានក្រុមការងារគណបក្សចុះមូលដ្ឋានខេត្តត្បូងឃ្មុំនាពេលនេះ បានប្រព្រឹត្តទៅ ប្រកបដោយបរិយាកាសរីករាយ សាមគ្គី និងសុទិដ្ឋិនិយមខ្ពស់ ស្របពេលដែលរាជរដ្ឋាភិបាល ដឹកនាំដោយគណបក្សប្រជាជនកម្ពុជា សម្រេចបានជោគជ័យក្នុងការអនុវត្ត អភិវឌ្ឍន៍សង្គមសេដ្ឋកិច្ចជាតិលើគ្រប់វិស័យ និងសម្រេចបានជ័យជំនះ យ៉ាងភ្លូកទឹកភ្លូកដីក្នុងការបោះឆ្នោត ជ្រើសតាំងតំណាងរាស្ត្រ នីតិកាលទី៧ នៃរដ្ឋសភា ដែលបានប្រព្រឹត្តទៅកាលពីថ្ងៃទី២៣ ខែកក្កដា ឆ្នាំ២០២៣ កន្លងមកនេះ ធ្វើឲ្យយើងមានលទ្ធភាព ពេញលេញក្នុងការបង្កើត រដ្ឋសភានីតិកាលទី៧ និងរៀបចំរាជរដ្ឋាភិបាលបន្តវេន ដែលដឹកនាំដោយសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្រ្តីនៃកម្ពុជាបច្ចុប្បន្ន។

សម្ដេចវិបុលសេនាភក្តី សាយ ឈុំ បានយកឱកាសនោះ ថ្លែងអំណរគុណដល់គណៈកម្មាធិការគណបក្ស គ្រប់ថ្នាក់ គ្រប់ផ្នែក សមាជិក សមាជិកាគណបក្ស មន្ត្រីរាជការ កងកម្លាំងប្រដាប់អាវុធ និងប្រជាជន នៅទូទាំងខេត្តត្បូងឃ្មុំ ដែលបានខិតខំយកអស់ពីកម្លាំងកាយ កម្លាំងចិត្ត កម្លាំងប្រាជ្ញា និងកម្លាំងធនធានផ្ទាល់ខ្លួន សម្រេចបាននូវសមិទ្ធផលដ៏ថ្លៃថ្លាកន្លងមកនេះ ដែលធ្វើឲ្យខេត្តត្បូងឃ្មុំ មានការរីកចម្រើន ជាបន្តបន្ទាប់គួរជាទីមោទនភាព ៕