មន្ទីរកិច្ចការនារីខេត្តត្បូងឃ្មុំ និងនាយកដ្ឋានស្ត្រី និងសុខភាព នៃក្រសួងកិច្ចការនារី សហការជាមួយក្រុមគ្រូពេទ្យភ្នែកស្ម័គ្រចិត្ត មកពីមន្ទីរពេទ្យព្រះនរោត្តមសីហនុក្រុងសួង បន្តចុះអប់រំផ្សព្វផ្សាយ ពិនិត្យ និងព្យាបាលភ្នែក ដោយឥតគិតថ្លៃ ជូនប្រជាពលរដ្ឋក្នុងសហគមន៍ នៅ

សេចក្ដីលម្អិត

ជំពូក៖ ព័ត៌មានខេត្ត

(ត្បូងឃ្មុំ) ៖ មន្ទីរកិច្ចការនារីខេត្តត្បូងឃ្មុំ សហការជាមួយនាយកដ្ឋានស្ត្រី និងសុខភាព នៃក្រសួងកិច្ចការនារី និងអង្គការហ្វ្រេតហូឡូ ដោយមានក្រុមគ្រូពេទ្យភ្នែកស្ម័គ្រចិត្ត មកពីមន្ទីរពេទ្យព្រះនរោត្តមសីហនុក្រុងសួង នៃមន្ទីរសុខាភិបាលខេត្ត នាថ្ងៃទី០៨ ខែធ្នូឆ្នាំ២០២៣ បានបន្តរៀបចំវេទិកាអប់រំផ្សព្វផ្សាយ ពិនិត្យ និងព្យាបាលភ្នែក ដោយឥតគិតថ្លៃ ជូនប្រជាពលរដ្ឋក្នុងសហគមន៍នៅឃុំព្រះធាតុ ស្រុកត្បូងឃ្មុំ ដែលមកទទួលសេវាព្យាបាលភ្នែក ប្រមាណជាង ២០០ នាក់ ។

នៅមណ្ឌលសុខភាពឃុំព្រះធាតុ ក្រោមអធិបតីភាព លោកស្រីវេជ្ជៈ. ឡេង មោនីភាព ប្រធាននាយកដ្ឋានស្ត្រី និងសុខភាព នៃក្រសួងកិច្ចការនារី លោកស្រី ថន គឹមស្រ៊ន់ ប្រធានមន្ទីរកិច្ចការនារីខេត្ត លោកស្រី ព្រហ្ម សិតា និងលោកស្រី សរ សិរីសុទ្ធី មកពីនាយកដ្ឋានស្ត្រី និងសុខភាពនៃក្រសួងកិច្ចការនារី រួមជាមួយអាជ្ញាធរមូលដ្ឋាន នៅបរិវេណមណ្ឌលសុខភាពព្រះធាតុ ស្ថិតនៅឃុំព្រះធាតុ ស្រុកត្បូងឃ្មុំ ខេត្តត្បូងឃ្មុំ។

នាឱកាសនោះ លោកស្រី ថន គឹមស្រ៊ន់ បានថ្លែងអំអរគុណយ៉ាងជ្រាលជ្រៅ ចំពោះ លោកស្រីវេជ្ជៈ. ឡេង មោនីភាព ប្រធាននាយកដ្ឋានស្ត្រី និងសុខភាព នៃក្រសួងកិច្ចការនារី ក្រោមការឧបត្ថម្ភ របស់អង្គការហ្វ្រេតហូឡូ ដោយមានក្រុមគ្រូពេទ្យភ្នែកស្ម័គ្រចិត្ត មកពីមន្ទីរពេទ្យព្រះនរោត្តមសីហនុក្រុងសួង នៃមន្ទីរសុខាភិបាល ខេត្តត្បូងឃ្មុំ ដែលបានសហការគ្នាបង្កើតឱ្យមានគម្រោងនេះឡើង។

នេះគឺជាការរួមចំណែកមួយដ៏សំខាន់ ជាមួយរាជរដ្ឋាភិបាល ក្នុងការលើកកម្ពស់វិស័យសុខាភិបាល ពិសេសសុខភាពភ្នែក ជូនដល់ប្រជាពលរដ្ឋ ពិសេសប្រជាពលរដ្ឋដែលកំពុងមានជំងឺភ្នែក ។ លោកស្រីប្រធានមន្ទីរកិច្ចការនារីខេត្ត បន្តថា សកម្មភាពចុះព្យាបាលជំងឺភ្នែកជាបន្តបន្ទាប់នេះ បានជួយសម្រាលការលំបាក របស់ប្រជាពលរដ្ឋបានមួយកម្រិត ក្នុងការស្វែងរកកន្លែងព្យាបាលជំងឺផងដែរ ។

ហើយការពិនិត្យ និងព្យាបាលនេះ មានការពិនិត្យ បាយភ្នែក កន្ទុយថ្លែនភ្នែក ភ្នែកស្ងួត និងកំហុសកំណុំ ជាដើម ។

លោកស្រី ថន គឹមស្រ៊ន់ ប្រធានមន្ទីរកិច្ចការនារីខេត្ត ក៏បានអំពាវនាវដល់ពុកម៉ែបងប្អូនដែលមានបញ្ហាភ្នែកសូម មកទទួលសេវាព្យាបាលដោយឥតគិតថ្លៃនេះ សូមកុំភ័យខ្លាច ហើយសង្ឃឹមថា ក្រោយពីការ វេះកាត់ព្យាបាលពីគ្រូពេទ្យជំនាញ ពុកម៉ែបងប្អូននឹងបានមើលឃើញឡើងវិញ ហើយនិងបានឃើញទិដ្ឋភាពដ៏ស្រស់ត្រកាលនៃប្រទេសជាតិយើង ដែលកំពុងតែមានការអភិវឌ្ឍក្រោម ដំបូលសន្តិភាព ដែលស្ថិតក្រោមការដឹកនាំដ៏ត្រឹមត្រូវរបស់សម្តេមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

បើតាមរបាយការណ៍ ពីលោកស្រីតំណាងអង្គការហ្រ្វេតហូឡូ បានឱ្យដឹងថា អង្គការ បានធ្វើប្រតិបត្តិការមនុស្សធម៌នេះ ក្នុងឆ្នាំ ២០២៣ នៅខេត្តត្បូងឃ្មុំ បានចំនួន ៤ លើកមកហើយ រួមមាន៖ ស្រុកត្បូងឃ្មុំ ចំនួន ៣ លើក និងស្រុកអូរាំងឪ ចំនួន ១ លើក ។

ជាកស្តែង ថ្ងៃនេះ វេទិកាអប់រំផ្សព្វផ្សាយ ពិនិត្យ និងព្យាបាលភ្នែក ដោយឥតគិតថ្លៃ ជូនប្រជាពលរដ្ឋក្នុងសហគមន៍នៅឃុំព្រះធាតុ មានប្រជាពលរដ្ឋមកទទួលសេវា ព្យាបាល សរុបចំនួន ២២២នាក់ ស្រី១៤៩នាក់ ដោយពិនិត្យឃើញ អ្នកមានជំងឺ ៖ បាយភ្នែក ៣៣នាក់ ស្រី២៤នាក់, កន្ទុយថ្លែន៥៨នាក់ ស្រី ៤០នាក់ និងបានបញ្ជូនទៅមន្ទីរពេទ្យបង្អែកស្រុកត្បូងឃ្មុំ១០១នាក់ ផងដែរ ៕