Apple ប​ង្កើនទុនផលិត iPhone រហូតដល់ ១៤ពាន់លានដុល្លារក្នុងប្រទេសឥណ្ឌា

សេចក្ដីលម្អិត

ជំពូក៖ ព័ត៌មានផ្សេងៗ

(បរទេស)៖ ប្រភពពីសារព័ត៌មាន Bloomberg News បានរាយការណ៍មកថា Apple ឥឡូវនេះបានប្រមូលផ្តុំការផលិត និងតំឡើង iPhone ក្នុងប្រទេសឥណ្ឌាមានតម្លៃសរុបដល់ ១៤ពាន់លានដុល្លារគិតត្រឹមដើមឆ្នាំ២០២៤។

នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១០ ខែមេសា ឆ្នាំ២០២៤។ របាយការណ៍ពី Bloomberg ដដែលបាននិយាយថា Apple ឥឡូវនេះ បង្កើនទិន្នផលផលិតបានច្រើនដល់ទៅ ១៤ភាគរយ ឬប្រហែល ១ ក្នុងចំណោម ៧នៃឧបករណ៍ marquee របស់ខ្លួនដែលផលិតនៅក្នុងប្រទេសឥណ្ឌា។

ទាំងនោះ គឺបានរួមចំណែកមកពីក្រុមហ៊ុនផ្គត់ផ្គង់ដូចជា Foxconn បានប្រមូលផ្តុំជិត ៦៧ភាគរយ និង Pegatron Corp ផលិតបានប្រហែល ១៧ភាគរយ រួមជាមួយនឹងក្រុមហ៊ុន Tata Group ផងដែរ។ តែយ៉ាងណាជុំវិញព័ត៌មានលម្អិតផ្សេងទៀតអំពីរបាយការណ៍នេះ Apple មិនបានចេញមុខធ្វើអត្ថាធិប្បាយនោះទេ។ គួរជម្រាបដែរថា Apple កំពុងសម្លឹងមើលកាន់តែខ្លាំងឡើង ដើម្បីបង្កើនខ្សែសង្វាក់ផ្គត់ផ្គង់របស់ខ្លួនលើសពីប្រទេសចិន ចំពេលមានភាពតានតឹងផ្នែកភូមិសាស្ត្រនយោបាយរវាងទីក្រុងប៉េកាំង និងទីក្រុងវ៉ាស៊ីនតោន បើទោះបីជាប្រទេសចិននៅតែជាមជ្ឈមណ្ឌលផលិត iPhone ដ៏ធំបំផុតនៅក្នុងពិភពលោកក៏ដោយ៕

ដកស្រង់ពី៖Fresh News