នាយករដ្ឋមន្ត្រីជប៉ុន «កំពុងបំពេញ​ទស្សនកិច្ចនៅ​តំបន់អឺរ៉ុប» ដើម្បីរឹតចំណង​មិត្តភាព និងស្វែងរក​ការគាំទ្រ​លើបញ្ហានានា!

សេចក្ដីលម្អិត

ជំពូក៖ ព័ត៌មានអន្តរជាតិ

 (តូក្យូ)៖ នាយករដ្ឋមន្ត្រីជប៉ុន លោក ស៊ីនហ្សូ អាបេ និង ប្រធានាធិបតីបារាំង លោក ហ្រ្វង់ស័រ ហូឡង់ បានព្រមព្រៀងគ្នាក្នុងការពង្រីកកិច្ចសហប្រតិបត្តិការ ក្នុងវិស័យថាមពលនុយក្លែអ៊ែរ រវាងប្រទេសទាំងពីរ ហើយដែលការព្រមព្រៀងនេះ ធ្វើឡើងនៅក្នុងឱកាស នៃការបំពេញទស្សនកិច្ចក្នុងតំបន់អឺរ៉ុបរបស់ លោក អាបេ កាលពីថ្ងៃចន្ទដែលមានការលើកឡើងនូវបញ្ហាជាច្រើន ក្នុងនោះក៏មានបញ្ហាកូរ៉េខាងជើងផងដែរ។

នេះបើតាមការចេញផ្សាយដោយ សារព័ត៌មាន NHK នៅព្រឹកថ្ងៃអង្គារ ទី២១ ខែមីនា ឆ្នាំ២០១៧។ ថ្លែងនៅក្នុងសន្និសីទសារព័ត៌មានរួមគ្នា ក្នុងទីក្រុងប៉ារីស លោក អាបេ និងលោក ហូឡង់ ក៏បានឯកភាពគ្នាក្នុងការធ្វើការងារយ៉ាងជិតស្និទ្ធ ដើម្បីរក្សាសណ្ដាប់ធ្នាប់ពីតំបន់មហាសមុទ្រឥណ្ឌា រហូតដល់តំបន់ប៉ាស៊ីហ្វិក ក្នុងនោះរួមមានទំាងគំរោងចូលរួម ធ្វើសមយុទ្ធយោធា ជាមួយសហរដ្ឋអាមេរិក បង្ហាញសាច់ដុំដាក់ទីក្រុងប៉េកាំងថែមទៀតផង។

គួរបញ្ជាក់ថាកាលពីថ្ងៃចន្ទ លោក ស៊ីនហ្សូ អាបេ ក៏បានជួបពិភាក្សាការងាររយៈពេលមួយម៉ោង ជាមួយអធិការបតីអាល្លឺម៉ង លោកស្រី អេនជែឡា មឺគែល ផងដែរ ដោយក្នុងនោះអ្នកទំាងពីរសន្យាថានឹងធើ្វការងាររួមគ្នា ជាមួយនឹងទីក្រុងវ៉ាស៊ីនតោន សំដៅលើកកម្ពស់ពាណិជ្ជកម្មសេរី ស្របពេលកំពុងមានការ ព្រួយបារម្ភកាន់តែច្រើនឡើងជុំវិញគោលនយោបាយគំាពារនិយម៕

ដកស្រង់ពី៖ Fresh News