តុលាការកំពូលម៉ាឡេស៉ី បន្ធូរបន្ថយទោសប្រហារជីវិត សម្រាប់អ្នកទោស៧នាក់ដំបូង នៅក្រោមច្បាប់ថ្មី

សេចក្ដីលម្អិត

ជំពូក៖ ព័ត៌មានអន្តរជាតិ

  (គូឡាឡាំពួ)៖ នៅថ្ងៃអង្គារនេះ តុលាការជាន់ខ្ពស់បំផុតរបស់ម៉ាឡេស៉ី បានសម្រេចបន្ធូរបន្ថយទោសប្រហារជីវិត របស់អ្នកទោស៧នាក់ដំបូង មកនៅត្រឹមជា ទោសជាប់ពន្ធនាគារអស់មួយជីវិតវិញ បន្ទាប់ពី៤ខែមុន ប្រទេសអាស៊ានមួយនេះ បានលុបចោលជាផ្លូវការ នូវការផ្តន្ទាទោសប្រហារជីវិតជាកាតព្វកិច្ច។

នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៤ ខែវិច្ឆិកា ឆ្នាំ២០២៣។ នៅក្រោមច្បាប់ថ្មី ដែលបានចូលជាធរមានកាលពីខែកក្កដា ឆ្នាំនេះ ចៅក្រមមានជម្រើសផ្តន្ទាទោសដាក់ពន្ធនាគាររយៈពេលវែងរហូតដល់៣០ឆ្នាំ ជំនួសឱ្យទោសប្រហារជីវិត។

ពីមុនមក ការផ្តន្ទាទោសសម្រាប់បទល្មើសធ្ងន់ៗមួយចំនួន រួមមានទាំងឃាតកម្មនិងការជួញដូរគ្រឿងញៀន គឺត្រូវតែផ្តន្ទាទោសប្រហារជីវិតដោយស្វ័យប្រវត្តិ។ ចាប់តាំងពីការចូលជាធរមាននៃច្បាប់ថ្មី តុលាការសហព័ន្ធ ដែលជាតុលាការកំពូលម៉ាឡេស៉ី បានពិនិត្យឡើងវិញ លើសាលក្រមផ្តន្ទាទោសប្រហារជីវិត នាពេលកន្លងមក។

ក្រុមមេធាវីរបស់អ្នកជាប់ទោសប្រហារជីវិតសរុបជាង៨៦០នាក់ បានដាក់សំណើឱ្យមានការបន្ធូរបន្ថយទោសដល់កូនក្តីរបស់ពួកគេ។ នៅថ្ងៃអង្គារនេះ ទោសប្រហារជីវិតក្រោមបទល្មើសជួញដូរគ្រឿងញៀន នៃអ្នកទោសចំនួន៧នាក់ដំបូងគេ ក្នុងនោះរួមមានជនជាតិម៉ាឡេស៉ី៥នាក់ និងថៃ២នាក់ ត្រូវបានតុលាការកំពូលនៃប្រទេសម៉ាឡេស៉ី សម្រេចបន្ថយមកនៅត្រឹមជាទោសប្រហារជីវិត។

ទោសប្រហារជីវិតនៅម៉ាឡេស៉ី ត្រូវបានកំណត់ថា ជាការជាប់ក្នុងពន្ធនាគាររយៈពេល ៣០ឆ្នាំ ហើយអ្នកទោសអាចត្រូវដោះលែងឱ្យមានសេរីភាពបាន ប្រសិនបើប្រកាន់អាកប្បកិរិយាល្អ ក្រោយអនុវត្តបាន១ភាគ៣ នៃរយៈពេលទោសជាប់ពន្ធនាគាររបស់ពួកគេ។

តុលាការកំពូលម៉ាឡេស៉ី បានអះអាងថា មុនឈានដល់ការសម្រេចខាងលើ ខ្លួនបានពិចារណាលើកត្តាចម្រុះជាច្រើន រួមមានទាំងអាយុអ្នកទោស ស្ថានភាពសុខភាព និងចំនួនឆ្នាំដែលពួកគេបានជាប់ពន្ធនាគាររួចមកហើយ។

គួរបញ្ជាក់ថា អ្នកទោសទាំង៧នាក់ខាងលើ គឺម្នាក់ៗបានស្ថិតក្នុងពន្ធនាគាររយៈពេលជាង២០ឆ្នាំមកហើយ។ យ៉ាងណាមិញ វាមិនទាន់ច្បាស់នៅឡើយទេថា តើក្នុងចំណោមពួកគេ អាចមានអ្នកដែលនឹងត្រូវដោះលែងឱ្យមានសេរីភាព ក្នុងពេលឆាប់ៗខាងមុខដែរឬយ៉ាងណា។

ប្រទេសម៉ាឡេស៉ី បានផ្អាកប្រហារជីវិតអ្នកទោសតាំងតែពីឆ្នាំ២០១៨មកម្ល៉េះ ប៉ុន្តែតុលាការបានបន្តផ្តន្ទាទោសប្រហារជីវិត លើអ្នកទោសដែលប្រព្រឹត្តបទល្មើសកម្រិតធ្ងន់ៗ៕

ដកស្រង់ពី៖ Fresh News