លោក Erdogan ថា នឹងសម្របសម្រួលដល់ការផ្តល់សច្ចាប័ន លើសំណើរសុំចូលជាសមាជិក NATO របស់ស៊ុយអែត

សេចក្ដីលម្អិត

ជំពូក៖ ព័ត៌មានអន្តរជាតិ

ប្រធានាធិបតីតួកគី លោក Tayyip Erdogan បាននិយាយថានឹងព្យាយាមសម្របសម្រួលជាមួយសភាក្នុងការផ្តល់សច្ចាប័នលើសមាជិកភាព NATO របស់ស៊ុយអែត តាមដែលអាចធ្វើទៅបាន ប៉ុន្តែបានបន្ថែមថា ទីក្រុងស្តុកខុល (Stockhom) មិនទាន់ចាត់វិធានការគ្រប់គ្រាន់លើក្រុមសកម្មប្រយុទ្ធឃឺដនៅឡើយទេ។

ថ្លែងទៅកាន់អ្នកសារព័ត៌មានក្នុងជើងហោះហើរត្រឡប់មកពីប្រទេសកាហ្សាក់ស្ថាន កាលពីថ្ងៃសុក្រសប្តាហ៍កន្លង លោក Erdogan បាននិយាយថា ទីក្រុង Stockholm បានចាត់វិធានការមួយចំនួនទាក់ទងនឹងការតវ៉ា ដែលរៀបចំដោយគណបក្សពលករឃឺដ (PKK) ប៉ុន្តែមិនមែនទៅលើសកម្មភាពរបស់ PKK នៅស៊ុយអែតនោះទេ។

សូមបញ្ជាក់ថា កាលពីខែតុលា កន្លងទៅ លោក Erdogan បានដាក់សំណើរច្បាប់អនុម័តលើពាក្យសុំចូលជាសមាជិកក្នុងអង្គការ NATO របស់ស៊ុយអែតទៅកាន់សភាសម្រាប់ការផ្តល់សច្ចាប័ន ដែលជាការផ្លាស់ប្តូរមួយដែលត្រូវបានស្វាគមន៍ដោយសម្ព័ន្ធមិត្ត និងទីក្រុង Stockholm នេះបើតាមការផ្សាយរបស់ Reuters កាលពីចុងសប្តាហ៏។