ពិព័រណ៍គំនូរកម្ពុជា-ចិន ត្រូវបានប្រារព្ធធ្វើឡើងនៅរាជធានីភ្នំពេញ
- សេចក្ដីលម្អិត
- ជំពូក៖ ព័ត៌មានទេសចរណ៍
ពិព័រណ៍គំនូរកម្ពុជា-ចិន ត្រូវបានប្រារព្ធធ្វើឡើងនៅរាជធានីភ្នំពេញ កាលពីថ្ងៃសុក្រ ដោយបានទាក់ទាញអ្នកទស្សនាយ៉ាងច្រើនកុះករ។
ដោយត្រូវបានសហការរៀបចំរួមគ្នាដោយរាជបណ្ឌិត្យសភាកម្ពុជា និងសាកលវិទ្យាល័យ Jiujiang របស់ប្រទេសចិន ព្រឹត្តិការណ៍រយៈពេលកន្លះថ្ងៃបានបង្ហាញពីផ្ទាំងគំនូររាប់សិបផ្ទាំង ដែលបង្ហាញពីទេសភាព វប្បធម៌ និងប្រពៃណីនៃប្រទេសទាំងពីរ ព្រមទាំងការសរសេរអក្សរផ្ចង់ចិនផងដែរ។
ថ្លែងក្នុងពិធីនោះ លោក សុខ ទូច ប្រធានរាជបណ្ឌិត្យសភាកម្ពុជាបានមានប្រសាសន៍ថា ការតាំងពិព័រណ៌នេះគឺជាផ្នែកមួយនៃសកម្មភាពរួមគ្នាដែលរៀបចំឡើងដើម្បីអបអរសាទរឆ្នាំផ្លាស់ប្តូររវាងប្រជាជននិងប្រជាជនកម្ពុជា-ចិនឆ្នាំ២០២៤។
លោកបន្តថា៖ «តាមរយៈការតាំងពិព័រណ៍គំនូរនេះ ខ្ញុំជឿជាក់ថាប្រជាជននឹងយល់កាន់តែច្បាស់អំពីវប្បធម៌ និងប្រពៃណីរបស់ប្រទេសកម្ពុជា និងប្រទេសចិន»។
លោក សុខ ទូច បានមានប្រសាសន៍ថា ព្រឹត្តិការណ៍នេះនឹងរួមចំណែកបន្ថែមទៀតក្នុងការលើកកម្ពស់ការយល់ដឹងគ្នាទៅវិញទៅមក និងការធ្វើឱ្យកាន់តែស៊ីជម្រៅនូវចំណងមិត្តភាពប្រពៃណីរវាងប្រជាជននៃប្រទេសទាំងពីរ។
លោកបានបន្តថា៖ «ការតាំងពិពណ៌គំនូររួមគ្នានេះប្រាកដជានឹងបញ្ចូលកម្លាំងជំរុញថ្មីដល់កិច្ចសហប្រតិបត្តិការវប្បធម៌រវាងប្រទេសទាំងពីរ»។
ផល ស្រីមាន អ្នកទស្សនាវ័យ៣០ឆ្នាំ បាននិយាយថា ពិព័រណ៍នេះនឹងរួមចំណែកបន្ថែមទៀតក្នុងការលើកកម្ពស់ទំនាក់ទំនងវប្បធម៌ និងការផ្លាស់ប្តូររវាងប្រជាជននិងប្រជាជននៃប្រទេសទាំងពីរ។
គាត់បានប្រាប់សារព័ត៌មានស៊ីនហួថា “ខ្ញុំចូលចិត្តការតាំងពិពណ៌គំនូរកម្ពុជា-ចិននេះខ្លាំងណាស់ ព្រោះវាអាចជួយពង្រឹងទំនាក់ទំនងកម្ពុជា-ចិនបន្ថែមទៀត និងលើកកម្ពស់ការយល់ដឹងអំពីវប្បធម៌រវាងប្រជាជនកម្ពុជា និងប្រជាជនចិន”។
គាត់បានបន្ថែមថា “ការតាំងពិពណ៌នេះក៏នឹងអនុញ្ញាតឱ្យនិស្សិត និងប្រជាជនកម្ពុជាបានស្គាល់កាន់តែច្រើនអំពីវប្បធម៌ចិន” និងបានសម្តែងនូវក្តីសង្ឃឹមថានឹងមានពិព័រណ៍គំនូរបែបនេះបន្ថែមទៀតនាពេលអនាគត។
បូ ស្រីនិច ជាភ្ញៀវទស្សនា វ័យ ២៨ ឆ្នាំ បាននិយាយថា នេះជាលើកទីមួយហើយ ដែលនាងបានឃើញការតាំងពិព័រណ៍គំនូរកម្ពុជា-ចិនរួមគ្នា។
នាងបានប្រាប់សារព័ត៌មានស៊ីនហួ ថា “ខ្ញុំចូលចិត្តការតាំងពិពណ៌គំនូរ ពីព្រោះវិចិត្រករមានទេពកោសល្យខ្ពស់ ហើយគំនូរគឺស្រស់ស្អាត និងរស់រវើក”។ “ផ្ទាំងគំនូរទាំងនេះបាននាំយើងទៅដល់សម័យបុរាណ ដោយប្រាប់យើងអំពីវប្បធម៌ និងប្រពៃណីដ៏ស្រស់បំព្រងរបស់ពួកគេ”។
ដកស្រង់ពី៖ ខ្មែរថាមស៍