រដ្ឋមន្ត្រីក្រសួងទេសចរណ៍កម្ពុជា ស្នើឯកអគ្គរដ្ឋទូតសហភាពអឺរ៉ុប ជំរុញការហោះហើរត្រង់ពីអឺរ៉ុបមកកម្ពុជា
- សេចក្ដីលម្អិត
- ជំពូក៖ ព័ត៌មានទេសចរណ៍
លោក សុខ សូកេន រដ្ឋមន្ត្រីក្រសួងទេសចរណ៍ បានទទួលជួបសម្តែងការគួរសមនិងពិភាក្សាការងារ ជាមួយលោក Igor Driesmans ឯកអគ្គរដ្ឋទូតសហភាពអឺរ៉ុប ដើម្បីពិភាក្សាអំពីឱកាសសម្រាប់កិច្ចសហប្រតិបត្តិការលើការអភិវឌ្ឍវិស័យទេសចរណ៍នៅកម្ពុជា។
យោងតាមក្រសួងទេសចរណ៍បានឱ្យដឹងថា លោករដ្ឋមន្ត្រីបានចែករំលែកគំនិតផ្តួចផ្តើមយុទ្ធសាស្ត្រ “បង្កើន៥ អភិវឌ្ឍ៣ (BUILD + 3Ds)” និងចក្ខុវិស័យលើការពង្រឹងយន្តការភាពជាដៃគូស្ថាប័នរដ្ឋនិងឯកជន តាមរយៈក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា ដើម្បីជំរុញឱ្យមានការចូលរួមយ៉ាងសកម្មពីវិស័យឯកជន។
ឯកឧត្តមរដ្ឋមន្ត្រី និងឯកអគ្គរដ្ឋទូតបានកត់សម្គាល់ពីការចូលរួមយ៉ាងសកម្ម និងកិច្ចសហប្រតិបត្តិការដ៏ល្អរបស់សភាពាណិជ្ជកម្មអឺរ៉ុប (EuroCham) ក្នុងការអភិវឌ្ឍន៍វិស័យទេសចរណ៍កម្ពុជា។
ឆ្លៀតក្នុងឱកាសនោះ លោក សុខ សូកេន បានស្នើឱ្យឯកអគ្គរដ្ឋទូត ជួយជំរុញក្រុមហ៊ុនទេសចរណ៍ និងអ្នកវិនិយោគអឺរ៉ុប មកបណ្តាក់ទុនក្នុងវិស័យទេសចរណ៍នៅកម្ពុជា និងបានស្នើឯកអគ្គរដ្ឋទូត ជួយជំរុញឱ្យមានការហោះហើរត្រង់ពីអឺរ៉ុបមកកម្ពុជា។
ដកស្រង់ពី៖ ខ្មែរថាមស៍