ស្រែអំបិលក្នុងខេត្តកំពតទទួលបានការទាក់ទាញពីភ្ញៀវទេសចរ
- សេចក្ដីលម្អិត
- ជំពូក៖ ព័ត៌មានទេសចរណ៍
ខេត្តកំពតជាប់មាត់សមុទ្ររបស់កម្ពុជាមើលឃើញសក្ដានុពលនៃស្រែអំបិលរបស់ខ្លួនជាកន្លែងទាក់ទាញទេសចរណ៍មួយទៀត។
លោក សយ ស៊ីណុល ប្រធានមន្ទីរទេសចរណ៍ខេត្តកំពតបានចែករំលែកការកត់សម្គាល់នេះ បន្ទាប់ពីបានសង្កេតឃើញការកើនឡើងនៃដំណើរទេសចរណ៍ទៅកាន់ស្រែអំបិល ដែលជំរុញឱ្យអ្នកស្រុកបង្កើតហាងអាហារ និងភេសជ្ជៈ រួមជាមួយនឹងសេវាកម្មទេសចរណ៍ផ្សេងៗទៀតតាមតម្រូវការ។
លោកក៏បានបង្ហាញពីចក្ខុវិស័យរបស់ថ្នាក់ដឹកនាំខេត្ត ក្នុងការប្រែក្លាយស្រែអំបិលឱ្យទៅជាតំបន់កសិទេសចរណ៍មួយផ្សេងទៀត។
គុណសម្បត្តិរួមមាន ទីតាំងស្រែអំបិល ដែលនៅជិតទីរួមខេត្ត ឆ្នេរសមុទ្រ និងជាកំពង់ផែទេសចរណ៍ដែលនឹងដំណើរការនាពេលខាងមុខនេះ។
ជាមួយនឹងការកើនឡើងនៃចំនួនភ្ញៀវទេសចរ ជាពិសេសភ្ញៀវទេសចរបរទេស មជ្ឈមណ្ឌលពិព័រណ៍ផលិតកម្មអំបិលធម្មជាតិកម្ពុជា ដែលត្រូវបានគេស្គាល់ថាជាសារមន្ទីរអំបិល នឹងបើកដំណើរការឡើងវិញក្នុងពេលឆាប់ៗនេះ បន្ទាប់ពីបិទដោយសារជំងឺកូវីដ-១៩។
បើតាមលោកនាយក បានឱ្យដឹងថា គិតត្រឹមខែមករា ឆ្នាំ២០២៤ មានភ្ញៀវទេសចរបរទេសប្រមាណ ៨០០០នាក់មកលេងខេត្តកំពត ហើយចំនួនបានកើនឡើងដល់ប្រមាណ ១២០០០នាក់ ក្នុងខែកុម្ភៈ ជាមួយនឹងការកើនឡើងជាបន្តបន្ទាប់ក្នុងខែមីនា។
ផ្អែកតាមកំណត់ត្រារបស់មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ត ខេត្តកំពត បានឱ្យដឹងថា ខេត្តនេះមានផ្ទៃដីស្រែអំបិលចំនួន ៣០០០ ហិកតា។
គិតត្រឹមដើមខែមីនា ខេត្តផលិតអំបិលបានប្រហែល ២០ ០០០ តោន ហើយត្រូវបានគេរំពឹងថានឹងបង្កើនទិន្នផលដល់ ១០០,០០០ តោន ប្រសិនបើអាកាសធាតុនៅតែបន្តអំណោយផលសម្រាប់ការផលិតអំបិល។
ដកស្រង់ពី៖ ខ្មែរថាមស៍