ការសិក្សាបច្ចេកទេសបង្ហាញពីលទ្ធផលវិជ្ជមានលើគម្រោងផ្លូវរថភ្លើងធុនស្រាលក្នុងរាជធានីភ្នំពេញ និងខេត្តសៀមរាប
- សេចក្ដីលម្អិត
- ជំពូក៖ ព័ត៌មានទេសចរណ៍
ក្រុមហ៊ុន China Metro Group ដែលធ្វើការសិក្សាបច្ចេកទេសលើប្រព័ន្ធរថភ្លើងធុនស្រាលក្នុងរាជធានីភ្នំពេញ និងខេត្តសៀមរាប បានរាយការណ៍ពីលទ្ធផលវិជ្ជមានក្នុងការសិក្សា ដោយលើកឡើងពីការប្តេជ្ញាចិត្តរបស់ខ្លួនក្នុងការធ្វើឱ្យគម្រោងទាំងនេះទទួលបានជោគជ័យ។
ការប្តេជ្ញាចិត្តនេះត្រូវបានធ្វើឡើងក្នុងជំនួបសម្តែងការគួរសម និងពិភាក្សាការងារ កាលពីថ្ងៃពុធ រវាងលោក លី ខ័រ (Li Kuo) អគ្គនាយកនៃក្រុមហ៊ុន China Metro Group ជាមួយ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនក្នុងរាជធានីភ្នំពេញ។
ក្នុងឱកាសជំនួបនោះ លោក Li បានជម្រាបសង្ខេបអំពីវឌ្ឍនភាពវិជ្ជមាននៃការសិក្សាលើគម្រោងអភិវឌ្ឍន៍ផ្លូវរថភ្លើងធុនស្រាលចំនួនពីរ ដោយលើកឡើងថា ខ្សែររថភ្លើងធុនស្រាលទាំងពីរនឹងតភ្ជាប់អាកាសយានដ្ឋានដោយផ្ទាល់ទៅកាន់កណ្តាលទីក្រុង។
ទី១៖ គម្រោងរថភ្លើងធុនស្រាលតភ្ជាប់អាកាសយានដ្ឋានអន្តរជាតិសៀមរាប-អង្គរ ទៅខេត្តសៀមរាប និងទី២៖ គម្រោងរថភ្លើងធុនស្រាលតភ្ជាប់អាកាសយានដ្ឋានអន្តរជាតិតេជោតាខ្មៅ មកកាន់រាជធានីភ្នំពេញ។
អាកាសយានដ្ឋានអន្តរជាតិតេជោតាខ្មៅ កម្រិត 4F គឺជាអាកាសយានដ្ឋានអន្តរជាតិមួយ ដែលបច្ចុប្បន្នកំពុងសាងសង់នៅក្នុងខេត្តកណ្តាល នៃប្រទេសកម្ពុជា ដែលស្ថិតនៅទីតាំងចម្ងាយប្រហែល ៣០ គីឡូម៉ែត្រ ភាគខាងត្បូងរាជធានីភ្នំពេញ និង អាកាសយានដ្ឋានអន្តរជាតិសៀមរាប-អង្គរ ដែលសាងសង់លើផ្ទៃដី ៧០០ ហិចតា ក្នុងស្រុកសូទ្រនិគម ស្ថិតនៅចម្ងាយប្រហែល ៥០ គីឡូម៉ែត្រពីក្រុងសៀមរាប និង ៤០ គីឡូម៉ែត្រពីប្រាសាទអង្គរវត្តនៅខាងក្នុងឧទ្យានអង្គរ។ អាកាសយានដ្ឋាននេះ គ្រោងនឹងចាប់ផ្តើមដំណើរការនៅពាក់កណ្តាលខែតុលា។
ក្រសួងបានបន្តថា៖ «ក្រុមហ៊ុន China Metro Group បង្ហាញពីសុឆន្ទៈ និងការប្ដេជ្ញាចិត្តក្នុងការលើកកម្ពស់ប្រព័ន្ធរថភ្លើងធុនស្រាលក្នុងប្រទេសកម្ពុជា។
លោក ប៉េង ពោធិ៍នា បានកោតសរសើរចំពោះលទ្ធផលវិជ្ជមានរបស់ក្រុមហ៊ុន China Metro Group លើប្រព័ន្ធដឹកជញ្ជូនផ្លូវដែកធុនស្រាលនៅកម្ពុជា។ លោក ប៉េង ពោធិ៍នា បានបន្ថែមថា “គម្រោងទាំងពីរនឹងរួមចំណែកកាត់បន្ថយការកកស្ទះចរាចរណ៍ និងផ្តល់ជម្រើសក្នុងការធ្វើដំណើរបន្ថែមសម្រាប់ប្រជាជនកម្ពុជា ក៏ដូចជាភ្ញៀវទេសចរ”។
វឌ្ឍនភាពនេះកើតឡើងចំពេលដែលរដ្ឋាភិបាលបានទាក់ទាញអ្នកវិនិយោគ ឱ្យមកវិនិយោគលើហេដ្ឋារចនាសម្ព័ន្ធខ្នាតធំ ការសាងសង់ផ្លូវថ្នល់ ស្ពាន កំពង់ផែ ផ្លូវរថភ្លើង ផ្លូវល្បឿនលឿន អាកាសយានដ្ឋាន កំពង់ផែ និងមជ្ឈមណ្ឌលភស្តុភារ។
យោងតាមផែនការមេ គ្រប់ជ្រុងជ្រោយស្តីពីប្រព័ន្ធដឹកជញ្ជូន និងភស្តុភាររបស់កម្ពុជាឆ្នាំ ២០២៣-២០៣៣ រដ្ឋាភិបាលកំពុងស្វែងរកប្រភពថវិកាប្រមាណ ៤០ ប៊ីលានដុល្លារ សម្រាប់ការអភិវឌ្ឍន៍គម្រោងហេដ្ឋារចនាសម្ព័ន្ធអាទិភាពចំនួន ១៧៤។
កាលពីថ្ងៃចន្ទ ឯកឧត្តមបណ្ឌិតនាយករដ្ឋមន្ត្រី ហ៊ុន ម៉ាណែត បានជំរុញអ្នកវិនិយោគចិនឱ្យស្វែងរកឱកាសវិនិយោគលើហេដ្ឋារចនាសម្ព័ន្ធនៅកម្ពុជា ខណៈប្រទេសកម្ពុជា ផ្តល់អាទិភាពដល់ការកសាងហេដ្ឋារចនាសម្ព័ន្ធរូបវន្តក្នុងការអភិវឌ្ឍន៍សេដ្ឋកិច្ចសង្គមរបស់ខ្លួន។
ឯកឧត្តមបណ្ឌិតនាយករដ្ឋមន្ត្រី បានបន្ថែមថា “ខ្ញុំលើកទឹកចិត្តឱ្យអ្នកវិនិយោគចិន និងជឿជាក់មកលើរដ្ឋាភិបាលកម្ពុជា និងបន្តវិនិយោគលើហេដ្ឋារចនាសម្ព័ន្ធដឹកជញ្ជូនខ្នាតធំនៅកម្ពុជា”។
ដកស្រង់ពី៖ ខ្មែរថាមស៍