ខេត្តសៀមរាបធ្វើជាម្ចាស់ផ្ទះរៀបចំបុណ្យទន្លេលើកទី៨
- សេចក្ដីលម្អិត
- ជំពូក៖ ព័ត៌មានទេសចរណ៍
រាជរដ្ឋាភិបាល តាមរយៈក្រសួងទេសចរណ៍ បានសហការជាមួយរដ្ឋបាលខេត្តសៀមរាប ដើម្បីរៀបចំបុណ្យទន្លេលើកទី៨ នាឆ្នាំ២០២៤នេះ។
ក្រសួងទេសចរណ៍ដែលដឹកនាំដោយឯកឧត្តម សូ ម៉ារ៉ា រដ្ឋលេខាធិការនៅថ្ងៃទី១ ខែកុម្ភៈ កន្លងទៅនេះ បានដឹកនាំកិច្ចប្រជុំមួយដើម្បីត្រៀមរៀបចំបុណ្យទន្លេលើកទី៨ ដែលធ្វើឡើងនៅខេត្តសៀមរាប ចាប់ពីថ្ងៃទី១៦ ដល់ថ្ងៃទី១៨ ខែមីនា ឆ្នាំ២០២៤។ កិច្ចប្រជុំនោះក៏មានកិច្ចពិភាក្សាលើកម្មវិធីសំខាន់ៗ មួយចំនួន និងការរៀបចំស្ដង់ពិព័រណ៍ជាដើម។
ឯកឧត្តម សូ ម៉ារ៉ា បានបញ្ជាក់ថា នេះជាឆ្នាំទី៨ហើយដែលបុណ្យទន្លេត្រូវបានរៀបចំឡើង ដែលរៀបចំដំបូងនៅឆ្នាំ២០១៥ នាខេត្តក្រចេះ។ នៅឆ្នាំថ្មីនេះ បុណ្យទន្លេនឹងកាន់តែប្លែក និងពិសេសជាងឆ្នាំមុនៗ ដោយភ្ជាប់ជាមួយនឹងទិដ្ឋភាពបង្ហាញដល់ទេសចរអន្ដរជាតិដែលមកកម្សាន្ត ខេត្តសៀមរាប។
ក្រៅពីកម្មវិធីពិព័រណ៍ ក្នុងបុណ្យទន្លេក៏មានរៀបចំកម្មវិធីជិះកង់ ជិះទូក ដាំកូនឈើ ព្រលែងត្រី វាយកូនហ្គោល កម្មវិធីអប់រំពីបុណ្យទន្លេដោយប្រឡងតែងសេចក្ដី និងគូគំនូ ឬសិក្ខាសាលាលើ វិស័យទេសចរណ៍ និងកម្មវិធីផ្សព្វផ្សាយទេសចរណ៍ជាច្រើនទៀត។ ក្នុងនោះ ក៏គ្រោងមានកម្មវិធី ប្រណាំងទូក មេគង្គបូក១ ផងដែរ។ កម្មវិធីខាងលើបានកំណត់យកសួនច្បារព្រះរាជដំណាក់ ដើម្បីរៀបចំ និងរំពឹងថា មានសាធារណជន ភ្ញៀវទេសចរជាតិ-អន្ដរជាតិជាច្រើនចូលរួមកម្សាន្ត។
សូមបញ្ជាក់ថា បុណ្យទន្លេធ្វើឡើងក្នុងគោលបំណងបំផុសចលនាមហាជន ឱ្យចូលរួមក្នុងការងារអភិវឌ្ឍ ធនធានទន្លេប្រកបដោយនិរន្តភាព និងចូលរួមសម្រេចយុទ្ធនាការពិពិធកម្មទេសចរណ៍ តាមរយៈការបង្កើត ព្រឹត្តិការណ៍ទេសចរណ៍ថ្មីៗសម្រាប់ខេត្តដែលជាប់តាមដងទន្លេនៃព្រះរាជាណាចក្រកម្ពុជា ។ ពិធីនេះក៏ជាផ្នែកមួយ ដើម្បីទាក់ទាញភ្ញៀវទេសចរជាតិ និងអន្តរជាតិឲ្យចូលរួមទស្សនាកម្សាន្ត ក្នុងអំឡុងព្រឹត្តិការណ៍នេះដែរ៕
ដកស្រង់ពី៖ ខ្មែរថាមស៍