មន្ដ្រីនគរបាលពាក់ស័ក្ដិ៣ ដែលប្រមាថអាយុជីវិតសម្ដេចតេជោ ហ៊ុន សែន ត្រូវតុលាការចេញដីកាឃុំខ្លួន ដាក់ពន្ធនាគារហើយ
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
(ភ្នំពេញ)៖ ក្រោយបញ្ចប់ការសួរនាំ នៅល្ងាចថ្ងៃទី១៤ ខែមិថុនា ឆ្នាំ២០១៧នេះ លោក ហេង សុខណា ចៅក្រមស៊ើបសួរសាលាដំបូង រាជធានីភ្នំពេញ បានចេញដីកាសម្រេចឃុំ ខ្លួនមន្ដ្រីនគរបាលពាក់ស័ក្ដិ៣ ដែលប្រមាថ អាយុជីវិត សម្ដេចតេជោ ហ៊ុន សែន និងគ្រួសារសម្តេច ដាក់ពន្ធនាគារហើយ ។
សូមបញ្ជាក់ថា មន្ដ្រីនគរបាលឈ្មោះ លាង ឡា ពាក់ស័ក្ដិ៣ មានតួនាទីជា នាយរងផ្នែក នៃការិយាល័យ គណនេយ្យ នាយកដ្ឋានភស្ដុភារ និងសម្ភារបច្ចេកទេស របស់ក្រសួងមហាផ្ទៃ ដែលបានប្រើសរសេរប្រមាថអាយុជីវិត របស់សម្ដេចតេជោ ហ៊ុន សែន និងក្រុមគ្រួសាររបស់សម្តេច នៅលើបណ្ដាញសង្គម Facebook នោះ នៅរសៀលថ្ងៃទី១៤ ខែមិថុនា ឆ្នាំ២០១៧នេះ ត្រូវបានតុលាការចោទប្រកាន់ ជាផ្លូវការហើយ ។ មន្ត្រីតុលាការថ្លែងថា លោក សៀង សុខ ព្រះរាជអាជ្ញារង អមសាលាដំបូង រាជធានីភ្នំពេញ សម្រេចចោទ ប្រកាន់ឈ្មោះ លាង ឡា ពីបទ « គំរាមកំហែងថានឹងសម្លាប់ » តាមមាត្រា២២៣ នៃក្រមព្រហ្មទណ្ឌ។
បច្ចុប្បន្នជនត្រូវចោទ និងសំណុំរឿងត្រូវ បានបញ្ជូនទៅចៅក្រមស៊ើបសួរ ចាត់ការបន្តតាមនីតិវិធី ។ នៅដំណាក់កាលនេះ ចៅក្រមស៊ើបសួរនឹងសម្រេច ឃុំ ខ្លួនឬមិនឃុំខ្លួនជនត្រូវចោទ ។ បទល្មើសគំរាម កំហែងថានឹងសម្លាប់ កំណត់ការផ្តន្ទាទោស ដាក់ពន្ធនាគារពី៦ខែ ទៅ២ឆ្នាំ និងពិន័យជាប្រាក់ពី ១លានរៀល ទៅ៤លានរៀល ។
សូមបញ្ជាក់ថា លោក លាង ឡា ដែលប្រើគណនី Facebook ឈ្មោះ Leala Leang ដែលបានកាត់តរូបសម្តេចតេជោ និងរូបខ្លួនឯងលើ Profile ពាក់ផ្កាយ៥ ហើយថែមទាំងសរសេរថា សហនាយករដ្ឋមន្រ្តីទី១ និងទី២ បានចូលទៅ comment នៅក្នុងផេករបស់ សម្ដេចតេជោ ហ៊ុន សែន ដោយប្រើពាក្យ ប្រមាថធ្ងន់ៗ ដល់សម្ដេច និងគ្រួសារ ខណៈដែលខ្លួនគឺ ជាមន្ដ្រីនគរបាលម្នាក់ របស់រាជរដ្ឋាភិបាល និងស៊ីប្រាក់ខែ របស់រាជរដ្ឋាភិបាល ៕
ដកស្រង់ពី៖ freshNews