ត្រឹម៣ថ្ងៃ! ឃាត់ខ្លួនប្រុសស្រី៥នាក់ និងដកហូតថ្នាំញៀ.នជាច្រើនកញ្ចប់
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
ខេត្តព្រៃវែង ៖ ជនសង្ស័យប្រុសស្រីចំនួន៥នាក់ ដែលជាមុខសញ្ញាជួញដូរ និងប្រើប្រាស់ថ្នាំញៀ.ន ត្រូវបានកម្លាំងកងរាជអាវុធហត្ថខេត្តព្រៃវែង ចាប់ខ្លួនបានជាបន្តបន្ទាប់ និងដកហូតបានវត្ថុតាងថ្នាំញៀនជាច្រើនកញ្ចប់។
លោកវរសេនីយ៍ទោ ផាត់ សុជោត ប្រធានមន្ទីរស្រាវជ្រាវនិងបង្ក្រាបទល្មើស កងរាជអាវុធហត្ថខេត្តព្រៃវែង បានឱ្យដឹងថា នៅថ្ងៃទី២៩ កុម្ភៈ កម្លាំងកងរាជអាវុធហត្ថខេត្ត បានប្រើប្រាស់វិធានញុះញង់ និងចាប់ឃាត់ខ្លួនជនសង្ស័យបានចំនួន៣នាក់ ដកហូតបានថ្នាំញៀនមួយកញ្ចក់តូច ។
ក្រោយត្រូវបានចាប់ខ្លួន ជនសង្ស័យទាំង៣នាក់បានឆ្លើយសារភាពថា ពួកគេទិញថ្នាំញៀននេះពីឈ្មោះ សឿន ឡូត ភេទស្រី រស់នៅភូមិឆ្ពឹស ឃុំថ្មពូន ស្រុកកញ្ជ្រៀច ខេត្តព្រៃវែង។
លោក ផាត់ សុជោត បានបញ្ជាក់ថា ដោយមានការឆ្លើយបំភ្លឺពីជនសង្ស័យទាំង៣នាក់ នៅថ្ងៃទី២៩កុម្ភៈ លោកក៏ដឹកនាំកម្លាំងចុះទៅស្រាវជ្រាវនៅស្រុកកញ្ជ្រៀចបន្តទៀត ប៉ុន្តែរកមិនឃើញជនសង្ស័យ ដោយជនសង្ស័យបានផ្លាស់ទៅរស់នៅក្នុងខេត្តកំពង់ចាមបាត់។
ទើបនៅថ្ងៃទី១ មីនា លោកបានសុំការអនុញ្ញាតពីឯកឧត្តមព្រះរាជអាជ្ញា ធ្វើការពន្លៀតដែនដី ដោយសហការជាមួយនឹងកម្លាំងអាវុធហត្ថខេត្តកំពង់ចាម ធ្វើការចុះស្រាវជ្រាវរហូតរកឃើញមុខសញ្ញាជនសង្ស័យនិងចាប់ឃាត់ខ្លួនបានចំនួនពីរនាក់ ដកហូតបានថ្នាំញៀនចំនួន10កញ្ចប់ទៀត។ ក្រោយពីត្រូវបានចាប់ឃាត់ខ្លួន ជនសង្ស័យទាំង ៥នាក់ រួមជាមួយវត្ថុតាងថ្នាំញៀន 11កញ្ចប់ ត្រូវបានកម្លាំងអាវុធហត្ថខេត្តព្រៃវែងកសាងសំណុំរឿងនិងបញ្ជូនទៅកាន់សាលាដំបូងខេត្តព្រៃវែងនៅព្រឹកថ្ងៃទី៣ មីនា ដើម្បីឱ្យខាងតុលាការកាត់ការបន្ត ៕
ដកស្រង់ពី៖កោះសន្តិភាព