ប្រទះឃើញថ្នាំញៀនអ៊ិចស្តាស៊ី ៣០៤កញ្ចប់ (ជាង២គីឡូក្រាម) ទុកនៅជាប់របងប៉ុស្តិ៍នគរបាលរដ្ឋបាលឃ្មួញ
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
រាជធានីភ្នំពេញ ៖ កម្លាំងនគរបាលប៉ុស្តិ៍ រកឃើញសារធាតុញៀន ចំនួន៣០៤កញ្ចប់ នៅជាប់របងប៉ុស្តិ៍នគរបាលរដ្ឋបាលឃ្មួញ ខណ្ឌសែនសុខ ខណៈនេះ សមត្ថកិច្ចកំពុងធ្វើការស្រាវជ្រាវ ករណីប្រទះឃើញគ្រឿងញៀននេះហើយ ។
បើតាមស្នងការដ្ឋាននគរបាលរាជធានីភ្នំពេញ បានអោយដឹងថា នៅថ្ងៃទី០៧ ខែកុម្ភៈ ឆ្នាំ២០២៤ កម្លាំងប៉ុស្តិ៍នគរបាលរដ្ឋបាលឃ្មួញ បានរកឃើញថង់ ចំនួន០៣ថង់ សង្ស័យជាសារធាតុញៀន ក្នុងនោះមានកញ្ចប់ពណ៌ខៀវទំពាំងបាយជូ ចំនួន ១៩៤កញ្ចប់ និងកញ្ចប់ពណ៌ក្រហមស្តូប៊ូរី ចំនួន ១១០កញ្ចប់ ទុកចោលនៅជាប់របងប៉ុស្តិ៍នគរបាលរដ្ឋបាលឃ្មួញ ។
កម្លាំងប៉ុស្តិ៍នគរបាលរដ្ឋបាលឃ្មួញ បានសហការជាមួយការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ ចុះមកពិនិត្យឃើញថា ជាសារធាតុញៀនប្រភេទ អ៊ិចស្តាស៊ី (MDMA) ចំនួន ៣០៤កញ្ចប់ ទម្ងន់ ២,៤៤១.៧៨ក្រាម ។ បច្ចុប្បន្ន កម្លាំងសមត្ថកិច្ច កំពុងធ្វើការស្រាវជ្រាវបន្ត។
យោងតាមការសន្និដ្ឋានរបស់សមត្ថកិច្ចថា គឺជនសង្ស័យភ័យខ្លាច ដោយមានគោលដៅ កម្លាំងសមត្ថកិច្ច ចុះអនុវត្តត្រួតពិនិត្យ ជាតិស្រវឹង និងអាវុធជាតិផ្ទុះនោះ ទើបជនសង្ស័យទម្លាក់ទុកក្បែររបងប៉ុស្តិ៍នគរបាលរដ្ឋបាលឃ្មួញ ៕
ដកស្រង់ពី៖កោះសន្តិភាព