សមត្ថកិច្ចចម្រុះខេត្តព្រះវិហារ ចុះបង្ក្រាបនិងរឹបអូសឈើជាច្រើនប្រភេទ
- សេចក្ដីលម្អិត
- ជំពូក៖ ព័ត៌មានសន្តិសុខសង្គម
កម្លាំងសមត្ថកិច្ចចម្រុះ នៅព្រឹកថ្ងៃទី១៤ ខែកញ្ញា ឆ្នាំ២០២២ បានចុះបង្ក្រាបនិងរឹបអូសបានឈើច្រើនប្រភេទ ចំនួន១៣៦សន្លឹក ស្ថិតនៅក្នុងដីឡូត៍មួយកន្លែង ខាងមុខសាលាស្រុកត្បែងមានជ័យ ។
ការចុះបង្ក្រាបនេះបានធ្វើឡើងក្រោមកិច្ចសហការរវាងកម្លាំងផ្នែក និងសង្កាត់រដ្ឋបាលព្រៃឈើត្បែងមានជ័យ កម្លាំងកងរាជអាវុធហត្ថស្រុក កម្លាំងនគរបាលស្រុក ដោយមានការចូលរួមពីលោក សុខ មុន្នីរិទ្ធ អភិបាលរងស្រុក និងមានសម្របសម្រួលពីលោក គឹម សំលេង ព្រះរាជអាជ្ញារងខេត្តព្រះវិហារ ផងដែរ ។ ចំណែកឈើ ដែលរឹបអូសបាននោះ មានចំនួន ១៣៦សន្លឹក មានមុខកាត់ពី ២០ ទៅ ៣០សង់ទីម៉ែត្រ និងមានប្រវែង ពីរម៉ែត្រ ឈើទាំងនោះ ត្រូវបាននាំយកទៅរក្សាទុក នៅផ្នែករដ្ឋបាលព្រៃឈើ ត្បែងមានជ័យ ដើម្បីកសាងសំណុំរឿងចាត់ការតាមច្បាប់ ។ ដោយឡែក នៅម៉ោងជាង៤រសៀលថ្ងៃទី១៤ កញ្ញានេះ មានក្រុមឈ្មួញបានដឹកឈើទាំងថ្ងៃ ចេញភូមិឈ្មួន ឃុំរួសរាន់ ស្រុករវៀង ត្រូវបានសមត្ថកិច្ច ផ្នែកសង្កាត់រដ្ឋបាលព្រៃឈើរវៀង និងកម្លាំងនគរបាលស្រុករវៀង ស្ទាក់ចាប់បាននៅលើផ្លូវជាតិលេខ៦២ ។
នៅពេលស្ទាក់ចាប់ អ្នកបើកបរបានរត់គេចខ្លួន បន្សល់ទុករថយន្តប្រភេទទួរីស ពណ៌ស ពាក់ស្លាកលេខ ភ្នំពេញ 2AG -5766 ដែលគេស្គាល់ថា ជារថយន្តដឹកឈើរបស់ឈ្មួញដុះស្លែរ ប្រចាំខេត្តព្រះវិហារ ។ សមត្ថកិច្ចជំនាញ នៅពុំទាន់វាស់ឈើទាំងនេះ មានចំនួនប៉ុន្មាននៅឡើយទេ ។ រថយន្ត និងឈើ ត្រូវបានសមត្ថកិច្ចជំនាញ ដឹកយកមករក្សាទុកនៅផ្នែករដ្ឋបាលព្រៃឈើរវៀង ដើម្បីចាត់ការទៅតាមនីតិវិធី ៕
ដកស្រង់ពី៖ កោះសន្តិភាព