ប្រតិបត្តិករទេសចរណ៍រំពឹងថានឹងមានកំណើនភ្ញៀវទេសចរនៅឆ្នាំ ២០២៤
- Details
- Category: ព័ត៌មានទេសចរណ៍
ភ្ញៀវទេសចរណ៍មកកាន់ប្រទេសកម្ពុជា ត្រូវបានព្យាករណ៍ថានឹងកើនឡើងដល់ជិតកម្រិតមុនជំងឺរាតត្បាត នៅឆ្នាំនេះ។ តួលេខពីឆ្នាំមុន មានភាពល្អប្រសើរ ដោយមានភ្ញៀវអន្តរជាតិ លើសពីតួលេខ៥លាន ដល់៥,៤៣ លាននាក់ នេះបើយោងតាមរបាយការណ៍របស់ក្រសួងទេសចរណ៍កាលពីពេលថ្មីៗនេះ។
តួលេខស្ថិតិបានដាក់ប្រាក់ចំណូលសម្រាប់ទីផ្សារការធ្វើដំណើរ និងទេសចរណ៍របស់ព្រះរាជាណាចក្រកម្ពុជាចំនួន ២៨៦,៤ លានដុល្លារក្នុងឆ្នាំនេះ។ ការព្យាករណ៍សម្រាប់អត្រាកំណើនប្រចាំឆ្នាំ (CAGR) ត្រូវបានគេរំពឹងថានឹងមាន ៧,៦៨ ភាគរយ នៅឆ្នាំ២០២៨ ជាមួយនឹងការរំពឹងទុកសម្រាប់បរិមាណទីផ្សារជិត ៣៨៥ លានដុល្លារ។
Catherine Germier-Hamel នាយកប្រតិបត្តិនៃក្រុមហ៊ុន Destination Mekong/Millennium Destinations បាននិយាយថា “វាមានសារៈសំខាន់ណាស់សម្រាប់ព្រះរាជាណាចក្រកម្ពុជាក្នុងការថែរក្សាអត្តសញ្ញាណ និងចរិតលក្ខណៈពិសេសរបស់ខ្លួន ដោយជំរុញឱកាសនានា ដើម្បីបង្ហាញពីសិល្បៈហត្ថកម្ម ប្រពៃណី និងវប្បធម៌ក្នុងស្រុក” ។ ដូច្នេះការវិនិយោគលើការអភិវឌ្ឍសិប្បកម្មខ្មែរជាកត្តាសំខាន់។ វាមិនត្រឹមតែមានសក្តានុពលក្នុងការបង្កើនប្រាក់ចំណូល និងបង្កើតឱកាសការងារប៉ុណ្ណោះទេ ប៉ុន្តែវាក៏ដើរតួយ៉ាងសំខាន់ក្នុងការអភិរក្សបេតិកភណ្ឌដ៏សម្បូរបែបរបស់កម្ពុជាសម្រាប់មនុស្សជំនាន់ក្រោយផងដែរ។
Craig Dodge នាយកផ្នែកលក់ និងទីផ្សារនៃអង្គការ Phare Circus បាននិយាយថា អ្វីដែលមានសក្ដានុពលបំផុតក្នុងការបង្កើនវិស័យទេសចរណ៍មកកម្ពុជាគឺការធ្វើទីផ្សារនិងទំនាក់ទំនងកាន់តែច្រើន។ យើងមានភាពទាក់ទាញ សកម្មភាព និងបទពិសោធន៍ ដើម្បីទាក់ទាញចំណាប់អារម្មណ៍ជាច្រើន ប៉ុន្តែភ្ញៀវទេសចរបរទេសមួយចំនួនតូចមិនបានដឹងអំពីរឿងអ្វីទាំងនេះ រហូតទាល់តែពួកគេបានមកដល់។
Steve Lidgey អ្នកគ្រប់គ្រងទូទៅនៃក្រុមហ៊ុន Travel Asia a la carte បាននិយាយថា “ខ្ញុំគិតថាតំបន់ឆ្នេរមានសក្តានុពលខ្លាំងបំផុតក្នុងការជំរុញចំនួនភ្ញៀវទេសចរណ៍” ។ ប្រទេសកម្ពុជាមានឆ្នេរសមុទ្រដើម្បីប្រជែងនឹងប្រទេសជិតខាងរបស់ខ្លួន ទោះជាយ៉ាងនេះក្តី មានការខ្វះខាតសណ្ឋាគារដែលមានគុណភាព បូករួមទាំងជើងហោះហើរទៅកាន់ខេត្តព្រះសីហនុ ដែលស្ទើរតែគ្មាន។ លោកបានបន្ថែមថា វានឹងត្រូវចំណាយពេលជាច្រើនឆ្នាំដើម្បីរឿងទាំងពីរនេះ កើតឡើង។
Nikolas Hatz ទីប្រឹក្សាជាន់ខ្ពស់ និងជាអ្នកជំនាញអភិវឌ្ឍន៍ទេសចរណ៍សម្រាប់កម្មវិធី GIZ ICONE បានពន្យល់ថា ប្រទេសកម្ពុជាគឺជាចំណុចសំខាន់មួយក្នុងការអភិវឌ្ឍន៍ទេសចរណ៍របស់ខ្លួន ដែលការសម្រេចចិត្តសំខាន់ៗនៃភាពពាក់ព័ន្ធជាយុទ្ធសាស្ត្រនឹងត្រូវធ្វើឡើងក្នុងពេលឆាប់ៗនេះ។ តើកម្ពុជាចង់ឈរនៅចំណុចណា? តើកម្ពុជាចង់ក្លាយជាគោលដៅទេសចរណ៍ប្រភេទណា? ហើយតើកម្ពុជាចង់ទៅដល់ក្រុមគោលដៅអ្វី?
Dodge បាននិយាយថា អ្នកធ្វើដំណើរសកម្មនឹងចូលចិត្តដើរលេងតាមផ្លូវក្នុងព្រៃ ក្នុងឧទ្យានអង្គរ ភ្នំគូលែន និងក្បាលស្ពាន។ អ្នកចូលចិត្តញុំាអាហារ នឹងចូលចិត្តជម្រើសអាហារបែបខ្មែរ អាហារអន្តរជាតិ និងអាហារសម្រន់ ដ៏ឈ្ងុយឆ្ងាញ់ នៅក្នុងខេត្តសៀមរាប និងទីក្រុងភ្នំពេញ។ អ្នកទេសចរដែលចាប់អារម្មណ៍លើសិល្បៈ វប្បធម៌ និងប្រវត្តិសាស្ត្រ ចូលចិត្តទស្សនាសារមន្ទីរ វិចិត្រសាល ប្រាសាទ និងការសម្តែងវប្បធម៌ក្នុងខេត្តសៀមរាប និងរាជធានីភ្នំពេញ។ អ្នកដំណើរបែបផ្សងព្រេងជាច្រើន នឹងចង់ទៅលេងខេត្តមណ្ឌលគិរី និងរតនគិរី។
Germier-Hamel បាននិយាយថា “ខ្ញុំតស៊ូមតិសម្រាប់ការផ្លាស់ប្តូរវិធីសាស្រ្តរបស់កម្ពុជាចំពោះការអភិវឌ្ឍន៍វិស័យទេសចរណ៍”។ ជំនួសឱ្យការផ្តោតតែលើការទាក់ទាញភ្ញៀវទេសចរកាន់តែច្រើន ប្រទេសគួរតែផ្តល់អាទិភាពដល់ការផ្សព្វផ្សាយបទពិសោធន៍ពិតប្រាកដ និងប្លែកៗ ដែលនាំអ្នកធ្វើដំណើរ ពីគោលដៅដដែល ដោយឱ្យស្គាល់ និងមានទំនាក់ទំនងយ៉ាងស៊ីជម្រៅជាមួយសហគមន៍មូលដ្ឋាន។
Lidgey បានបន្តថា ក្រៅពីទេសចរណ៍ឆ្នេរសមុទ្រ នៅមានសក្ដានុពលដ៏អស្ចារ្យសម្រាប់ប្រទេសកម្ពុជាក្នុងការឈានមុខគេជាមួយនឹងវិស័យទេសចរណ៍បៃតងដែលមានបរិស្ថានល្អ។ វិស័យនោះដើរទន្ទឹមគ្នាជាមួយនឹងការការពារបរិស្ថាន ការហាមប្រាមការប្រើផ្លាស្ទិកតែម្ដង និងលើកទឹកចិត្តដល់វិស័យឯកជនក្នុងការវិនិយោគ។
Hatz បាននិយាយថា “ខណៈពេលដែលធម្មជាតិដែលនៅដាច់ស្រយាល នៅភាគខាងកើតរបស់ប្រទេសកម្ពុជាមានសក្តានុពលទេសចរណ៍ដ៏ធំសម្បើម ធម្មជាតិទាំងនោះ ពិតជាមិនទាន់មានអ្នកណារំខាននៅឡើយ”។ ជាមួយគ្នានេះដែរ ដើម្បីជំរុញភ្ញៀវទេសចរឱ្យស្នាក់នៅរយៈពេលយូរ និងចំណាយពេលនៅឆ្នេរសមុទ្រកម្ពុជា និងនៅលើកោះកម្ពុជា បន្ទាប់ពីបានទស្សនាប្រាសាទនានាក្នុងខេត្តសៀមរាបនោះ គួរតែមានជម្រើសនៃការដឹកជញ្ជូនដែលមានការប្រកួតប្រជែងកាន់តែច្រើន ជាពិសេសពីខេត្តសៀមរាបទៅខេត្តព្រះសីហនុ។
របាយការណ៍របស់ក្រសួងទេសចរណ៍មានទស្សនវិស័យនាពេលអនាគត ជាមួយនឹងការរំពឹងទុកថាភ្ញៀវទេសចរបរទេសនឹងកើនឡើងដល់ ៧ លាននាក់ នៅឆ្នាំ២០២៥។ នេះនឹងលើសពីតួលេខមុនការរាតត្បាតជំងឺកូវីដ ចំនួន ៦,៦ លាននាក់ នៅឆ្នាំ២០១៩។ នៅឆ្នាំ២០២៣ អ្នកដំណើរមកដល់ចំនួនប្រហែល ២,២៨ លាននាក់ ជាភ្ញៀវទេសចរបរទេស ដោយកត់សម្គាល់ការកើនឡើងប្រចាំឆ្នាំ ចំនួន ១.០៥៨ ភាគរយ ជាមួយនឹងប្រាក់ចំណូលចំនួន ១.៤១៥ លានដុល្លារ។
ដកស្រង់ពី៖ ខ្មែរថាមស៍