អាជ្ញាធរទីក្រុងបាងកកនៃប្រទេសថៃ ប្រាប់ឱ្យអ្នកធ្វើការបំពេញការងារពីផ្ទះ ដើម្បីចៀសវាងខ្យល់ពុលដែលគ្របដណ្តប់ទីក្រុង

Details

Category: International News

អាជ្ញាធរទីក្រុងបាងកក បានស្នើសុំកិច្ចសហការពីសំណាក់ក្រុមហ៊ុន និងស្ថាប័នសរុបជាង១៥០ ទាំងវិស័យរដ្ឋ និងឯកជន ដើម្បីឱ្យបុគ្គលិកនៅក្នុងទីក្រុង អាចធ្វើការងារពីផ្ទះ សម្រាប់ថ្ងៃព្រហស្បតិ៍ និងថ្ងៃសុក្រសប្តាហ៍នេះ ដើម្បីចៀសវាងខ្យល់ពុល។

វែបសាយតាមដានគុណភាពខ្យល់អន្តរជាតិ IQAir បានបង្ហាញថា រាជធានីរបស់ប្រទេសថៃ ស្ថិតក្នុងចំណោមទីក្រុងទាំង១០ ដែលទទួលរងការបំពុលខ្យល់ខ្លាំងក្លាជាងគេបង្អស់ នៅលើពិភពលោក កាលពីព្រឹកថ្ងៃព្រហស្បតិ៍។

ទីក្រុងបាងកក និងទីក្រុងឆៀងម៉ៃនៅភាគខាងជើង បានជាប់ចំណាត់ថ្នាក់ ក្នុងចំណោមទីក្រុងរងការបំពុលខ្យល់អាកាសខ្លាំងបំផុត ជាច្រើនលើកកាលពីឆ្នាំមុន។កាលពីឆ្នាំ២០២៣ មនុស្សយ៉ាងហោច២លាននាក់ នៅប្រទេសថៃ បានស្វែងរកការព្យាបាលបញ្ហាសុខភាព ដោយសារតែការបំពុលខ្យល់។

សូមបញ្ជាក់ថា រដ្ឋាភិបាលរបស់នាយករដ្ឋមន្រ្តីថៃ លោក Srettha Thavisin ដែលបានឡើងកាន់អំណាចកាលពីខែសីហា ឆ្នាំមុន បានសន្យាថា នឹងប្រឹងប្រែងដោះស្រាយបញ្ហាបំពុលខ្យល់ ក្នុងលក្ខណៈជារបៀបវារៈជាតិមួយ ហើយសេចក្តីព្រាងច្បាប់ស្តីពីខ្យល់ស្អាត ត្រូវបានគាំទ្រដោយគណៈរដ្ឋមន្រ្តីរបស់លោក កាលពីខែមករាកន្លងទៅ។

យ៉ាងណាមិញ បញ្ហានៃការបំពុលនៅតែបន្ត ហើយតុលាការនៅទីក្រុងឆៀងម៉ៃ កាលពីខែមុន បានបង្គាប់ឱ្យរដ្ឋាភិបាលបង្កើតផែនការបន្ទាន់មួយ ឱ្យបានក្នុងរយៈពេល៩០ថ្ងៃ ដើម្បីដោះស្រាយបញ្ហាបំពុលខ្យល់អាកាស នេះបើតាមការផ្សាយរបស់ AFP ។