ភារីន រីប៊ើ គ្មានបំណងប្រឡូកវិស័យ beauty pageant ខណៈការងារសិល្បៈណែនពេញដៃ

សេចក្ដីលម្អិត

ជំពូក៖ ព័ត៌មានផ្សេងៗ

តារា Tik Tok ដ៏ល្បី លោក ភារីន រីប៊ើ (Phearin Reber) ឬគ្រប់គ្នាស្គាល់ថា Justin Inn បានបោះជំហានចូលវិស័យភាពយន្តយ៉ាងពេញទំហឹងហើយ បន្ទាប់ពីបានលោកលេចមុខក្នុងខ្សែភាពយន្ត និងរឿងភាគទូរទស្សន៍ជាបន្តបន្ទាប់។

អ្នកផលិតមាតិកាវ័យក្មេងនេះ ប្រាប់ឱ្យដឹងថា ឈានចូលឆ្នាំ ២០២៤ ភ្លាម លោកទទួលបានការងារសិល្បៈណែនដៃតែម្តង ក្នុងនោះមានទាំង ការថតភាពយន្ត , ថតប្រម៉ូតផ្សព្វផ្សាយ , ការធ្វើ content ប្លែកៗឱ្យ client , ការងារជា KOL ឱ្យបណ្តាក្រុមហ៊ុន និងការងារក្រុមហ៊ុន Media ផ្ទាល់ខ្លួនផងដែរ ជាហេតុធ្វើឱ្យលោកមមាញឹកខ្លាំងរកពេលដកឃ្លាស្ទើរមិនរួច។

មិនតែប៉ុណ្ណោះ ក៏មានការងារមួយចំនួនទៀត ដែលបានចុះកុងត្រាហើយតែមិនទាន់អាចបញ្ចេញបានទៀតផង។ សមត្ថភាព បូករួមរូបរាងខ្ពស់សង្ហា ទ្រេមុខកូនកាត់ខ្មែរ-ស្វីស ផងនោះ ធ្វើឱ្យ ភារីន ទទួលបានការចាប់អារម្មណ៍យ៉ាងរហ័សពីមហាជន រួមទាំងអ្នកនិយមគាំទ្រវិស័យបវរកញ្ញាផងដែរ ដោយពួកគេជំរុញចង់ឱ្យលោកចូលប្រកួតកម្មវិធីបុរសឯកកម្ពុជាទៀតផង ព្រោះមើលទៅយល់ថា ស័ក្កសម។ ពាក់ព័ន្ធរឿងនេះដែរ តារា Tik Tok ដ៏ល្បី ភារីន រីប៊ើ បានឆ្លើយតបថា លោកគ្មានចំណាប់អារម្មណ៍ប្រឡូកវិស័យ beauty pageant នោះទេ ទោះបីជាមានហ្វេនសួរនាំ និងជំរុញលោកឱ្យចូលប្រកួតកម្មវិធីបុរសឯកក៏ដោយ។

កូនកាត់ខ្មែរ-ស្វីសរូបនេះទទួលស្គាល់ថា លោកពិតជាមានរូបរាង មុខមាត់ កម្ពស់ និងចំណេះដឹង ស័ក្កសមប្រឡូកវិស័យ beauty pageant ពិតមែន តែខ្លួនលោកផ្ទាល់គ្មាននិស្ស័យជាមួយការងារនេះឡើយ ដោយគិតថា ខ្លួនឯងគ្មាន talent លើការដើរម៉ូដនោះឡើយ ហើយក៏មិនគិតសាកល្បងដែរ ពោលគឺចង់ទុកពេលធ្វើការងារសិល្បៈផ្សេងជំនួសវិញ។ គួររំឮកផងដែរថា ក្រៅពីការងារសិល្បៈ កំលោះសង្ហា ភារីន រីប៊ើ ក៏ជាកីឡាករបាល់បោះជម្រើសជាតិកម្ពុជាម្នាក់ផងដែរ តែលោកហាក់រយាលដៃពីការហាត់សមមួយរយៈ ដោយសារតែមមាញឹកការងារសិល្បៈខ្លាំងពេក តែទោះជាយ៉ាងណាលោកនៅតែស្រលាញ់អាជីពទាំងពីរនេះ មិនអាចបោះបង់មួយណាបានឡើយ៕

ដកស្រង់ពី៖Sabay