អាមេរិក បញ្ជូនយន្តហោះទម្លាក់គ្រាប់ សមត្ថភាពនុយក្លេអ៊ែ គ្រប់ប្រភេទទាំងអស់ ទៅអង់គ្លេស ជាលើកទី១ ស្របពេលភាពតានតឹង ជាមួយរុស្ស៊ី កំពុងកើនឡើង
- សេចក្ដីលម្អិត
- ជំពូក៖ ព័ត៌មានអន្តរជាតិ
អាមេរិក ៖ សហរដ្ឋអាមេរិក តាមសេចក្តីរាយការណ៍ ទើបបានបញ្ជូនយន្តហោះ ទម្លាក់គ្រាប់យុទ្ធសាស្ត្រ សមត្ថ ភាពនុយក្លេអ៊ែ ជាច្រើនគ្រឿងរបស់ខ្លួន ទៅកាន់ប្រទេសអង់គ្លេស ជាលើកដំបូង ស្របពេលដែលភាពតានតឹង នៅតែបន្តកើនឡើងខ្លាំង ជាមួយនឹងប្រទេសរុស្ស៊ី ។
ទីភ្នាក់ងារសារព័ត៌មាន Daily Mail ចេញផ្សាយនៅថ្ងៃទី១៤ ខែមិថុនា ឆ្នាំ២០១៧ បានឲ្យដឹងថា ក្នុងពេល បច្ចុប្បន្ននេះ យន្តហោះទម្លាក់គ្រាប់បំបាំងកាយ B-2 ចំនួនពីរគ្រឿង ដែលមួយគ្រឿងៗ មានតម្លៃជាងកន្លះ ពាន់លានដុល្លារ យន្តហោះទម្លាក់គ្រាប់ B-52H Stratofortress ចំនួនបីគ្រឿង និងយន្តហោះទម្លាក់គ្រាប់ B-1B Lancers ចំនួនបីគ្រឿងផងដែរ កំពុងស្ថិតនៅក្នុងមូលដ្ឋានទ័ពអាកាស RAF Fairford ប្រទេសអង់គ្លេស។
មន្ត្រីនាំពាក្យនៅមូលដ្ឋាន ទ័ពអង់គ្លេសមួយរូប បាននិយាយប្រាប់ឲ្យដឹងថា យន្តហោះទម្លាក់ គ្រាប់យុទ្ធសាស្ត្រ សមត្ថភាពនុយក្លេអ៊ែ ទាំងអស់នេះ នឹងត្រូវបានប្រើសម្រាប់ ធ្វើការគាំទ្រ ដល់សមយុទ្ធ BALTOPS សមយុទ្ធ Saber Strike និងសមយុទ្ធ ដែលប្រព្រឹត្តធ្វើឡើង នៅក្នុងតំបន់ ទំនួលខុសត្រូវ នៃទីបញ្ជាការ អឺរ៉ុបរបស់ សហរដ្ឋអាមេរិក ៕
ដកស្រងពី៖ដើមអម្ពិល