ក្ដៅៗស្មាត់ធំ គួន ម៉ុម ឆ្លើយតបហើយ ក្រោយសុវណ្ណនាថទទូចចង់សងសឹក

Details

Category: Sport News

ក្រោយចាញ់ គួន ម៉ុម ទាំងមិនអស់ចិត្តកីឡាករឆ្នើមនិងល្បីល្បាញ ក្នុងវិស័យកីឡាបាល់ទះក្រៅផ្លូវការ វ៉េត សុវណ្ណនាថ ដៃគូចាក់ទឹកមិនលេចរបស់ម៉ាប់ឆ្វេង បានចេញវីដេអូច្រើនលើកច្រើនសារផ្ញើទៅកាន់គួនម៉ុមដែលកំពុងលេងនៅលីគវៀតណាមអំពីការចង់សងសឹក ហើយមិនតែប៉ុណ្ណោះស្មាត់ធំរូបនេះថែមទាំងបានពន្យារពេលសំបុត្រយន្តហោះទៅអាមេរិកទៀតផង។

ទោះបីជាយ៉ាងណាគេនៅមិនទាន់ឃើញក្រុមរបស់ គួន ម៉ុម ឆ្លើយតបនៅឡើយទេ។ ពាក់ព័ន្ធនឹងការមិនទាន់ទទួលបានការឆ្លើយតបនេះ Sabay បានឆាតសួរគួនម៉ុមតាមរយៈប្រអប់សារ Facebook ហើយចម្លើយដែលទទួលបានគឺ គួន ម៉ុម រីករាយបើកឲ្យ វ៉េត សុវណ្ណនាថ សងសឹកដើម្បីឲ្យគេបានអស់ចិត្ត ហើយត្រឡប់ទៅអាមេរិកដោយសប្បាយរីករាយ។

ស្មាត់ធំរបស់សមាគមបាល់ទះវិសាខា គួន ម៉ុម បានចេញមុខឆ្លើយតបទៅកាន់ស្មាត់រហស្សនាមប្ដូរចង្កេះលើអាកាសថា រូបគេនឹងត្រឡប់មកកម្ពុជាឆាប់ៗ ដូច្នេះការប្រកួតអាចនឹងកើតឡើងមុនថ្ងៃចូលឆ្នាំថ្មីប្រពៃណីខ្មែរ។

គួន ម៉ុម បានបញ្ជាក់បែបនេះថា ៖«ខ្ញុំ Comment តបហើយតើខ្ញុំថាដាក់មុនចូលឆ្នាំទៅ ព្រោះខ្ញុំទៅវិញមុនចូលឆ្នាំអំឡុងថ្ងៃ៨ថ្ងៃ៩ទៅដល់ខ្មែរវិញហើយ ថាយ៉ាងយូរថ្ងៃ១០ ខ្ញុំថាដាក់ឲ្យគាត់តើ»។

កីឡាករមានដើមកំណើតនៅខេត្តតាកែវ គួនម៉ុម ថាការប្រកួតមួយនេះនឹងកើតឡើង ហើយប្រាកដណាស់ផ្អើលស្រុកខ្មែរ ហើយក៏ជាការប្រកួតមួយដើម្បីអបអរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។

គួរបញ្ជាក់ថា ការប្រកាសសងសឹករបស់ជើងខ្លាំង វ៉េត សុវណ្ណនាថ ធ្វើឡើងក្រោយកីឡាកររូបនេះចាញ់ គួនម៉ុម សឿនហេង និងសួន ចាន់ណារ៉ូ ទាំងពិន្ទុប្រដេញគ្នាកាលពីពេលថ្មីៗនេះ ខណៈអេគីបរបស់សុវណ្ណនាថមានម៉ាប់ឆ្វេង និងផានិតប៉ះសេ៕