បង្ក្រាបកុងស៊ីបញ្ចាំម៉ូតូមួយកន្លែងនៅឃ្លាំងរំសេវ ដកហូតម៉ូតូ៣១គ្រឿង និងស្លាកលេខជាង១០០បន្ទះ
- Details
- Category: Social Security News
រាជធានីភ្នំពេញ ៖ ទីតាំងកុងស៊ីបញ្ចាំ និងទិញលក់ម៉ូតូមួយកន្លែង នៅឃ្លាំងរំសេវ ត្រូវបានកម្លាំងនគរបាលការិយាល័យ ព្រហ្មទណ្ឌកំរិតស្រាល នៃនាយកដ្ឋានព្រហ្មទណ្ឌក្រសួងមហាផ្ទៃ សហការជាមួយអាជ្ញាធរ និងសមត្ថកិច្ចមូលដ្ឋានខណ្ឌទួលគោក ចុះបង្ក្រាបឆែកឆេរ ដោយដកហូតបានម៉ូតូ ចំនួន៣១គ្រឿង និងស្លាកលេខប្រមាណជាង១០០បន្ទះ និងកាតគ្រី និងអត្តសញ្ញាណមួយចំនួន ពាក់ព័ន្ធទិញលក់ស្លាកលេខម៉ូតូ ។
ការចុះបង្ក្រាបកុងស៊ីបញ្ចាំនេះ ធ្វើឡើងកាលពីវេលាម៉ោងប្រមាណ៣និង៣០នាទីរសៀល ថ្ងៃទី២០ ខែកុម្ភៈ ឆ្នាំ២០២៤ នៅចំណុចកុងស៊ីបញ្ចាំ និងទិញលក់ម៉ូតូ ស្ថិតនៅផ្ទះលេខ ៤៩B ផ្លូវលេខ១៩២ ភូមិ៤ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។ តាមមន្ត្រីនគរបាល អោយដឹងថា ប្រតិបត្តិការនេះដោយមានការអនុញ្ញាពីលោក គឹម ហុងសាន ព្រះរាជអាជ្ញារង នៃអយ្យការ អមសាលាដំបូងរាជធានីភ្នំពេញ និងដឹកនាំដោយលោកឧត្តមសេនីយ៍ត្រី វុទ្ធី វង្សវិបុល អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ និងមានការចូលរួមពីអាជ្ញាធរ និងនគរបាលខណ្ឌទួលគោក ផងដែរ ។
តាមព័ត៌មានអោយដឹងថា ការចុះឆែកឆេរ ដកហូតម៉ូតូនេះ ត្រូវគេដឹងថា ធ្វើឡើងបន្ទាប់ពីមានចម្លើយសារភាព ពីជនសង្ស័យម្នាក់ ដែលបានទិញ ស្លាកលេខម៉ូតូពីកុងស៊ីបញ្ចាំខាងលើ ហើយក៏បានយកទៅបង្ហោះលក់ជាសាធារណៈ នាពេលកន្លងមក។ ប្រភពព័ត៌មានបានអោយដឹងបន្តថា នៅក្នុងការចុះបង្ក្រាបឆែកឆេរនេះដែរ ម្ចាស់កុងស៊ី ទំនងជាដឹងខ្លួនទាន់ បានគេចខ្លួនបាត់ មុនពេល ដែលសមត្ថកិច្ចចុះទៅដល់កន្លែង ។
ប្រភពព័ត៌មានបង្ហើបអោយដឹងថា ក្នុងប្រតិបត្តិការខាងលើនេះ សមត្ថកិច្ចដកហូតម៉ូតូចំនួន ចំនួន៣១គ្រឿង, ស្លាកលេខម៉ូតូចំនួន១១២សន្លឹក, កាតគ្រីម៉ូតូចំនួន៧២សន្លឹក, អត្តសញ្ញាណប័ណ្ណចំនួន១១សន្លឹក, សំបុត្រកំណើតចំនួន០៣ច្បាប់, ធុងខ្យល់សម្រាប់កឹបស្លាកលេខចំនួន០១ និងកូនសោមួយចំនួនទៀត បញ្ជូនទៅកាន់នាយកដ្ឋានព្រហ្មក្រសួងមហាផ្ទៃ ដើម្បី ចាត់ការតាមនិតីវិធី ។ ទោះបីជាយ៉ាងណា នគរបាលព្រហ្មទណ្ឌ ក្រសួងមហាផ្ទៃ ពុំបានទម្លាយព័ត៌មានលម្អិតនោះទេ ដោយព្យាយាមលាក់បាំង និងហាមអ្នកសារព័ត៌មានថតផ្សាយផងដែរ។ បន្ទាប់ពីចប់ប្រតិបត្តិការ នៅម៉ោង០៤និង៣០នាទីល្ងាចថ្ងៃដដែល គណៈកម្មការចម្រុះក៏បានបិទសៀលនៅទីតាំងខាងលើ ជាបណ្តោះអាសន្ត ៕
ដកស្រង់ពី៖កោះសន្តិភាព