អាល្លឺម៉ង់ ដាក់សំណើបញ្ជាទិញកាំភ្លើងធំ howitzer លឿនជាងផែនការគ្រោងទុក (Video inside)
- Details
- Category: International News
(បែរឡាំង)៖ រដ្ឋមន្ត្រីការពារជាតិអាល្លឺម៉ង់ លោក បូរីស ពីទូរូស (Boris Pistorius) កាលពីថ្ងៃអាទិត្យចុងសប្តាហ៍កន្លងទៅបាននិយាយថា ទីក្រុងបែរឡាំងនឹងអាចសម្រេចបាននូវការបំពេញស្តុកកាំភ្លើងធំ howitzers របស់ខ្លួន ក្រោយពីបានបញ្ជូនទៅអ៊ុយក្រែន ដោយរំពឹងថាសំណើនេះត្រូវចុះហត្ថលេខានៅចុងខែមីនា ពោលគឺប៉ុន្មានខែមុនការគ្រោងទុក។
នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី២៧ ខែកុម្ភៈ ឆ្នាំ២០២៣។ លោក ពីទូរូស បានប្រាប់ទូរទស្សន៍ ARD របស់អាល្លឺម៉ង់ យ៉ាងដូច្នេះថា «ប្រសិនបើអ្វីៗដំណើរការល្អ កិច្ចសន្យាផ្តល់កាំភ្លើងធំ howitzers នឹងត្រូវចុះហត្ថលេខានៅចុងខែខាងមីនា ខាងមុខនេះ»។
យ៉ាងនេះក្តី លោក ពីទូរូស ដែលបានចូលកាន់តំណែងជារដ្ឋមន្រ្តីការពារជាតិអាល្លឺម៉ង់ កាលពីខែមករា មិនបានបញ្ជាក់ពីចំនួនអាវុធដែលនឹងត្រូវបញ្ជាទិញនោះទេ ប៉ុន្តែយោធាអាល្លឺម៉ង់កាលពីឆ្នាំ២០២២ បានផ្តល់កាំភ្លើងធំ howitzers ចំនួន ១៤គ្រឿងដែលផលិតដោយក្រុមហ៊ុន Krauss-Maffei Wegmann ទៅកាន់ទីក្រុងកៀវ។
គួរបញ្ជាក់ថា អតីតរដ្ឋមន្រ្តីការពារជាតិអាល្លឺម៉ង់ គ្រោងនឹងលើកសំណើបញ្ជាទិញកាំភ្លើងធំ howitzers ដាក់ជូនសភាអនុម័តនៅពាក់កណ្តាលឆ្នាំ២០២៣៕
ដកស្រង់ពី៖ Fresh News